20 Yanvar - 1990-da SSRİ Prezidenti Mixail Gorbaçovun göstərişi ilə
Sovet Ordusu hissələri həm quru, həm dəniz yolu ilə Bakı şəhərinə həmlə
edərək 100-dən artıq silahsız insanı qətlə yetirdi.
20 Yanvar - 1990 Azərbaycan xalqının tarixinə Qanlı Yanvar faciəsi kimi
daxil olmuş 1990-cı il 20 Yanvar hadisələrindən 23 il keçir.
Keçmiş sovet dövlətinin hərb maşınının həmin gün Azərbaycan xalqına
qarşı həyata keçirdiyi vəhşi terror aktı insanlığa qarşı törədilmiş ən
ağır cinayətlərdən biri kimi bəşər tarixində qara səhifə olaraq
qalacaqdır. Milli azadlığı, ölkəsinin ərazi bütövlüyü uğrunda mübarizəyə
qalxmış dinc əhaliyə divan tutulması, kütləvi terror nəticəsində
yüzlərlə günahsız insanın qətlə yetirilməsi və yaralanması totalitar
sovet rejiminin süqutu ərəfəsində onun cinayətkar mahiyyətini bütün
dünyaya bir daha nümayiş etdirdi.
Sovet Ordusunun böyük kontingentinin, xüsusi təyinatlı bölmələrin və
daxili qoşunların Bakıya yeridilməsi xüsusi qəddarlıq və görünməmiş
vəhşiliklə müşayiət edildi. Kommunist diktaturası Çexoslovakiyaya,
Macarıstana, Əfqanıstana qarşı həyata keçirdiyi hərbi müdaxiləni hətta o
zamankı Sovet İttifaqının müttəfiq respublikalarından biri olan
Azərbaycanda da təkrarlamaqdan çəkinmədi. Həmin vaxt Azərbaycan qonşu
Ermənistanın da təcavüzünə məruz qalmışdı. Belə bir şəraitdə sovet
rəhbərliyi nəinki münaqişənin qarşısını almaq üçün qəti tədbirlər
görməmiş, əksinə, Azərbaycana yeridilən ordu hissələrinin tərkibinə
Stavropol, Krasnodar və Rostovdan səfərbərliyə alınan erməni əsgər və
zabitləri, sovet hərbi hissələrində xidmət edən ermənilər, hətta erməni
kursantlar da daxil edilmişdi.
Qadınlar.Biz - saytı olaraq, bütün sayt administrasiyası və dəyərli istifadəçilərimiz adından Vətən uğrunda qəhramancasına şəhid olmuş həmvətənlərimizin ruhlarına ALLAH`dan rəhmət diləyir ailələrinə isə səbr arzu edirik.