SİÇOVUL (SİÇAN)
Bu
adamlar üçün 2015-ci il bir qədər narahat keçəcək. Onlar ən böyük
ideyalarını məhz bu ərəfədə reallaşdırmaq istədikləri üçün maneə və
çətinlikləri çox olacaq. Bunun üçün onlar mütləq təcrübəli insanların
köməyindən istifadə etməli, reallığa obyektiv qiymət verməlidirlər.
Siçovul ilində doğulanlar ilin birinci yarısında iki istiqamətdə ciddi
rəqiblə baş-başa qalacaqlar. Lakin özlərini tənzimləyə bilməsələr, bu
rəqabət sonda düşmənçiliyə və münaqişələrə də gətirib çıxara bilər. Hər
halda, ilk altı ayı təmkinlə başa vurmaq lazım gələcək.
İkinci
yarım ildə isə Siçovullar üçün yeni qapılar açılacaq və onlar nəzərdə
tutduqları planların müəyyən hissəsini həyata keçirə biləcəklər. Onların
karyerada böyük uğurlar əldə edəcəyi inandırıcı görünməsə də, maliyyə
problemləri müəyyən qədər öz həllini tapacaq. Ətrafında yeni dostların
artmasından fərəhlənən bu adamlar qısa vaxtda onların çoxuna inamını
itirəcək.
Ümumiyyətlə, 2015-ci ildə bəhs etdiyimiz şəxslərin
ovqatı istənilən səviyyədə olmayacaq. Nə əməlli-başlı istirahət
edəcəklər, nə də nəzərdə tutduqlarını tam şəkildə həyata keçirəcəklər.
Amma faciə və fəlakətlərdən, xəstəlik və pulsuzluqdan uzaq olduqları
üçün Ulu Tanrıya şükür etməyi unutmamalıdırlar. Ailə-sevgi münasibətləri
də normal müstəvidə inkişaf edəcək.
ÖKÜZ
2014-ci
ildən narazı ayrılan Öküz Keçinin gəlişinə əzmkarlıqla hazırlaşacaq. Bu
qisim adamların təmkinli davranışı, hadisələrə soyuq baxış nümayiş
etdirməsi il boyu onlara müəyyən köməklik edəcək. Lakin ətraflarında
olan adamlarla hesablaşmamaları nəticədə özlərinə çoxsaylı problemlər
yaradacaq. Öküzlər il başlayan kimi paralel olaraq bir neçə işin
icrasına başlayacaq, hətta yaz aylarına qədər uğurlu nəticələr əldə
edəcəklər. Buna baxmayaraq, onlar öz öhdəliklərinə layiqincə əməl edə
bilməyəcəklər. Sonra isə qısamüddətli durğunluq dövrü başlayacaq. Belə
məqamlarda Öküzlərin kənar dəstəyə böyük ehtiyacı yaranacaq. Bəs dəstək
olacaqmı? Əlbəttə ki, bu, onların zövq və həvəslərindən, atacaqları
addımdan asılı olacaq.
Ümumi götürsək, 2015-ci il bu adamlar
üçün narahat əhval-ruhiyyə yaradacaq. Dostluqda uğursuzluq, karyerada
lazımi pillənin fəth edilməməsi, büdcədən narazılıq onların ovqatına
mənfi təsir göstərəcək. Buna baxmayaraq, subayların ailə qurmaq şansı
daha da artacaq. Üstəlik, neçə ildən bəri yığılıb qalmış daxili
gərginlikləri istirahətlər hesabına aradan qalxacaq. Payız aylarında isə
bir qədər müalicə-profilaktik tədbirləri həyata keçirməyə ehtiyac
olacaq.
PƏLƏNG
Ötən ili yüksək ovqatla
başa vuran bu şəxslər əgər "müvəffəqiyyətdən başgicəllənməsi"nə mübtəla
olublarsa, Keçinin ilk aylarında çətin məqamlarla rastlaşacaqlar. Hətta
ola bilsin ki, qazandıqları nailiyyətlərin bünövrəsi də laxlasın.
Əlbəttə ki, bu kimi hallarla rastlaşmamaq üçün əzmkarlığı azaltmamalı,
qarşıya qoyulan bütün öhdəliklərə qətiyyətlə nail olmaq lazımdır. Əgər
çevik Pələnglər dediyimiz tövsiyələrə əməl edə bilsələr, yaz aylarından
etibarən ömürlərinin daha parlaq anlarını yaşayacaqlar.
2015 həm
də Pələnglərin özünüdərk ili kimi yadda qalacaq. Onlar zəmanənin
nəbzini tutacaq, insanların daxilini daha dərindən duyacaq, üstəlik,
təhlükə və xoş məqamları əvvəlcədən hiss edəcəklər. Bu istiqamətdə
ibadət etmək, Tanrıya daha yaxın olmaq ilk növbədə vacib şərtdir.
Keçi
ilinin himayəsində bu adamlar maraqlı səyahətlər edəcək, yeni dostlar
qazanacaq, üstəlik, karyerada ciddi nüfuz əldə edəcəklər. Subay
Pələnglərin evlənmə dövrü də bu ərəfəyə düşəcək. Bir sözlə, bu il bəy və
ya gəlin masasında daha çox məhz bu qrupun nümayəndələrini görəcəyik.
Payız
aylarında müalicəyə ehtiyac duyan Pələnglər gərək vaxtında özlərinə
çarə qılsınlar. Əks təqdirdə, yağışlı-küləkli həftələri xəstəxanada
keçirəcəklər. Pulla bağlı məsələlərə gəlincə, 2015 onlar üçün səmərəli
il olacaq.
PİŞİK (DOVŞAN)
2015-ci ilin
elə ilk aylarındaca bu insanlar çoxsaylı sürprizlərlə qarşılaşacaqlar.
Hətta bəzən elə olacaq ki, eyni vaxtda bir neçə sevindirici hadisənin
şahidi və ya iştirakçısı olacaqlar. Bu isə onların qəlbini riqqətə
gətirəcək və Keçinin gəlişindən məmnun olacaqlar. Amma yaz aylarında
Pişiklər böyük bir maneə ilə rastlaşacaqlar ki, bunun da öhdəsindən
təkbaşına gələ bilməyəcəklər. Onlar daha çox dost xəyanətindən
sarsılacaqlar. Uzun müddət səmimi davranış gördüyü insanların bəd
xislətini müşahidə edən Pişiklər yayın sonlarına qədər məyusluq hissi
keçirəcəklər. Lakin buna ehtiyac yoxdur. Çünki həyat davam edir və
insanın çiy süd əmdiyi, günahsız olmadığı əzəldən bəllidir. Bunun
əvəzinə mübarizlikdən dönməməli, yeni dostluq tellərini yaratmaq
lazımdır.
Barəsində danışdığımız adamlar üçün ən uğurlu ərəfə
ilin ikinci yarısına təsadüf edəcək. Belə ki, onlar taleyində köklü
dəyişiklik və müsbət dönüş təxminən yayın ortalarından start götürəcək.
Yeni işlərə başlamaq, daşınmaz əmlak sahibi olmaq və toya hazırlaşmaq bu
adamlar üçün asanlaşacaq. Onlar üçün ilin başlıca vəzifəsi bədbinlikdən
uzaq olmaq, gələcəyə ümidlə baxmaq olmalıdır. Yalnız bu halda ili
xoşbəxt şəraitdə başa vurmaq mümkündür. Belə olsa, Pişiklər kasıblığın
nə olduğunu da bilməyəcəklər. Ötən illə müqayisədə bu il səhhətlə bağlı
ciddi problemlər də gözlənilmir.
ƏJDAHA
Göstəricilərə
inansaq, 2014-ci il bu şəxslər üçün kifayət qədər mürəkkəb və
sınaqlarla zəngin keçib. Ona görə də mövcud problemlərin həlli üçün
Keçinin gəlişinə ümid bəsləməyə dəyər. Bir amili də unutmaq olmaz ki, bu
il Əjdahaların durumu daha çox öz seçimlərindən asılı olacaq. Əgər
həlledici məqamlarda yenə də bilərəkdən (nadir hallarda bilməyərəkdən -
red.) qeyri-obyektiv qərar çıxarsalar, ilin sonuna qədər böyük-böyük
ideyaları həyata keçməmiş qalacaq. Odur ki, reallığa düzgün qiymət
vermək onlar üçün əsas şərt olmalıdır.
Qarşılıqlı münasibətlərdə
yenilik həvəskarı olan Əjdahalar bu il də çoxlu dost-tanış
qazanacaqlar. Ailə-sevgi məsələlərində vəziyyət isə yalnız yaz və payız
aylarında qənaətbəxş olacaq. Evlənmək üçün ən uğurlu il də məhz bu
ərəfəyə təsadüf edəcək. Odur ki, il başlayan kimi hazırlaşmağa dəyər.
Səhhətə gəlincə, Əjdahalar özlərini daha çox iqlimin qəfil dəyişdiyi
günlərdə qorumalıdırlar. Çünki qeyri-sabit hava onlara pis təsir edir.
Barəsində
danışdığımız şəxslər - əgər aktiv fəaliyyətə həvəslidirlərsə - pulsuz
qalmayacaqlar. Ötən ilə nisbətən bu il şəxsi büdcə onları qane edəcək.
Hətta əzmkarlığı artırsalar, onlar karyerada böyük uğurlara
yiyələnəcəklər. Konkret desək, bu adamlar "ağa ağ, qaraya qara" desələr,
il boyu yüksək ovqatla yaşayacaqlar.
İLAN
Bir
qayda olaraq Keçi ili İlanlar üçün sakit tərzdə cərəyan edir. Bu
səbəbdən də barəsində danışdığımız insanların hansısa faciə və ya
sarsıdıcı uğursuzluqla üzləşəcəyi ağlabatan deyil. Düzdür, ilin əvvəli,
xüsusən də ilk üç ayı dözülməz çətinliklə keçəcək, lakin ətrafdakı
dost-tanışlar sayəsində onlar yaranmış problemlərin öhdəsindən gələ
biləcəklər.
2015-ci ildə bu adamların başlıca vəzifəsi yaradıcı
işlərə aludə olmaq, istirahəti təmin etmək və cəmiyyətdə hökm sürən
proseslərə yalnız müşahidəçi gözü ilə baxmaq olmalıdır. Əgər onlar
ətraflarının şüurunda hansısa dəyişiklik etmək fikrinə düşsələr, mütləq
uğursuzluqla rastlaşacaqlar. Hətta onların şərə düşmə, çirkin oyunlara
cəlbolunma ehtimalları da var. Əxlaqsız adamlarla tez-tez üzləşən
İlanlar mütləq öz müdriklikləri ilə qurtuluş yolu aramalıdırlar. Yaxşı
olar ki, münasibət məsələlərində ailə-sevgi amili daha da qabardılsın.
Yay
ayları istisna olunmaqla, bu il İlanların maddi durumu qənaətbəxş
olacaq. Bu amil onların çoxdan bəri həyata keçməyən bəzi planlarının
reallaşmasına təkan verəcək. Fəaliyyətdə isə çoxsaylı yeniliklər, o
cümlədən populyarlıq gözlənilir. Keçi ili bu şəxsləri çoxsaylı
səyahətlərlə təmin etməklə bahəm, sağlamlıqlarının da keşiyində duracaq.
AT
Təcrübə
göstərir ki, Keçi illəri bu qrupa mənsub olanlara bir qayda olaraq
xoşbəxtlik vəd edir. Deməli, ruhdan düşmək, "onsuz da yenə alınmayacaq"
deməyə tələsmək lazım deyil. Çünki ilk aylardan əksər sahələrdə
proseslər elə həddə çatacaq ki, bundan yalnız fərəhlənmək olar. Yeni iş
təklifləri, maraqlı insanlarla görüşlər Atların həyata baxışını köklü
surətdə dəyişəcək. Onlar başa düşəcəklər ki, ötən Zodiak dövrünü -
Keçidən Keçiyə qədər olan 12 illik tsikli, sən demə, daha çox mənasız və
əbəs yerə ötürüblər. Bu fəlsəfi düşüncələr Atların daha aktiv
fəaliyyətə başlamasına zəmin yaradacaq. Artıq bu adamlar gedəcəklərin
yolun konturlarını müəyyən edəcəklər və elə bu zaman (yaz aylarında)
qarşılarına çıxan çoxsaylı rəqiblərini görəcəklər. Həmin ərəfədə geri
çəkilməyə və ya tərəddüd etməyə lüzum yoxdur. Əksinə, riks edib
"dördnala çapmaq" və rəqibə qarşı "kişnəmək" lazımdır. Yalnız bu halda
qələbəyə yaxınlaşmaq olar.
Barəsində danışdığımız şəxslər payıza
doğru sabit ərəfə ilə rastlaşacaqlar. Artıq üzüntülü anların geridə
qalmasından şad olacaqlar. Amma əsəbi situasiyalar iz qoyduğundan mütləq
ciddi istirahət etmək, müalicə olunmaq lazım gələcək. Keçinin
hakimiyyəti ərəfəsində Atlar əsl rahatlığı məhəbbət amilində tapacaqlar.
Bütün umu-küsüləri bir tərəfə atıb yeni mərhələyə, firavan məqamlara
yetişmək onların başlıca vəzifəsinə çevrilməlidir. Ötən üç illə
müqayisədə bu il Atların maddi vəziyyəti xeyli yaxşılaşacaq.
KEÇİ (QOYUN)
Geniş
şərh etməyə ehtiyac yoxdur ki, hər kəsin öz ili özünə düşür və başqa
dövrlərlə müqayisədə şansları daha çox olur. Bu səbəbdən də Keçilər
özləri haqqında yazılmış bu proqnozlardan maksimum yararlanmalıdırlar.
Göstəricilərə inansaq, bu adamlar üçün ilin ilk yarısı dərketmə ərəfəsi
kimi yadda qalacaq, sonrakı dövrsə aktiv fəaliyyət müddəti olacaq. Belə
ki, onlar yayın ortalarına qədər iştirakçısı olduqları situasiyaları
təhlil edəcək, öz mövqe və müttəfiqlərini dəqiqləşdirəcək, sonrakı yarım
ildə isə nəzəriyyə və planlarının həyatda tətbiqi ilə məşğul olacaqlar.
Amma hər ehtimala qarşı tədbirli olmaq və dönə-dönə götür-qoy etmək də
lazımdır. Çünki Keçilərin ətrafına bədxah adamlar da toplaşacaq.
2015-ci
ildən lazımınca istifadə edən bu şəxslər karyerada ağlagəlməz zirvələri
asanlıqla fəth edəcək, paralel olaraq bir neçə fəaliyyət növü ilə
məşğul olacaqlar. Yeni dostların, ağıllı həmkarların sayəsində isə
qarşıya çıxan maneələri dəf etməkdə çətinlik çəkməyəcəklər. Payız
toylarında şadlıq evlərini, toyxanaları Keçilərin 24 yaşlı nümayəndələri
(1991-ci ildə doğulanlar) daha çox bəzəyəcək. Bu isə onların şəxsi
həyatında mühüm və mənalı hadisə kimi həkk olunacaq. Fəaliyyət zəminində
işlərin çox olması bu il onların istirahətini əlindən alsa da, səhhətlə
bağlı hansısa problem də baş verməyəcək. Yalnız qış aylarında azacıq
nasazlığa mübtəla ola bilərlər. İndiki dövrün həlledici vasitələrindən
olan büdcə məsələləri isə ötən dövrlərə nisbətən Keçiləri razı sala
biləcək.
MEYMUN
2015-ci il bu aralığa
mənsub şəxslər üçün müəyyən qədər müəmmalı keçəcək. Belə ki, iştirakçısı
olduqları proseslərdə məntiqsizlik, anlaşılmazlıq və enişli-yoxuşlu
məqamlar kifayət qədər olacaq. Bu səbəbdən də ilin ilk ayları Meymunlar
üçün mürəkkəb və çətin keçəcək. Yaxşı olar ki, həmin ərəfədə bütün
diqqət baş verən hadisələrin analiz olunmasına yönəlsin. Təxminən Novruz
bayramına qədər reallığa obyektiv qiymət verilsə, sonrakı dövrlərdən
xoş olaylar gözləməyə dəyər.
Keçi, barəsində danışdığımız
adamlara çoxsaylı sürprizlər də bəxş edəcək. Yazın ortalarında və yayın
sonlarında onlar üçün gözlənilməz hadisələr baş verəcək ki, bundan
yalnız fərəhlənmək olar. Bu sıraya nüfuzlu şəxslərlə tanışlıq, karyeraya
ucalmaq da aiddir. Hətta ola bilsin ki, Meymunların yüksək dairələrlə
əlaqəsi vəzifə pilləsində yüksək pillələrə yetişməyi sürətləndirsin.
Şəxsi büdcəni zənginləşdirmək üçün bu ilin əhəmiyyəti böyük olacaq.
Astroloji göstəricilər bu adamların təzadlı məqamlar yaşayacağını da
bəyan edir. Bu paralelliksə, onlarda ümumi işlərin ləng inkişafına səbəb
ola bilər. Odur ki, bir-birinə zidd olan işlərdən bacardıqca uzaq olmaq
lazımdır.
Məhəbbətdə macəra və oyunları sevən Meymunlar
ehtiyatlı olmağı da unutmamalıdırlar. Əks təqdirdə ayrılıq, küsüşmə və
hətta izdivacın pozulması kimi hallar da baş verə bilər. Bu səbəbdən də
ailə-sevgi münasibətlərinə kifayət qədər ciddi yanaşmaq lazımdır. Payız
aylarında sağlıq durumunun passivləşməsindən şikayətlənən Meymunlar
mütləq müayinədən keçməlidirlər.
XORUZ
Ötən
4 il ərzində ən böyük arzuları həyata keçməmiş qalan Xoruzlar yeni
ildən böyük dəyişikliklər gözləyəcəklər. Amma əvvəlcə bir neçə məsələyə
baxışda dəyişiklik etmək lazım gələcək. Bunun üçün "yalnız özüm
haqlıyam" prinsipini, kimə gəldi, məsləhətlər verməyi, boş-boş
layihələrin həllinə çalışmağı bir kənara qoymaq, təcrübəli adamların
nəsihətlərindən istifadə etmək vacibdir.
Sakit həyat tərzinə
uyuşmayan Xoruzlar 2015-ci ildə də macəralara həvəs göstərəcəklər.
Qoçaqlıqları və cəsurluqları sayəsində müəyyən irəliləyişlərə nail
olsalar da, bu macəraların acı nəticəsini də dada bilərlər. Bu il
onların ən xoşagəlməz münasibətləri qohum və doğmaları ilə olacaq. Hətta
hər şeyi zarafata salmaq, dərinliyə varmamaq, davranışlarda laqeydlik
bu şəxsləri təhlükəyə də ata bilər. Bir sözlə, barəsində danışdığımız
adamlar özlərini işə salmaqdan qorumalıdırlar. Əgər bunu bacarsalar,
istər karyerada, istərsə də fəaliyyət prinsipində kifayət qədər
irəliləyişə nail ola bilərlər.
Ailədə əsas diqqəti özündə
cəmləşdirməyə çalışan Xoruzlar buna çətinliklə nail olacaqlar. Çünki
onların baxışları heç də doğmaları ilə eyni səviyyədə olmayacaq və öz
istəklərinə olsa-olsa, ilin ilk üç ayında çatacaqlar. Bu adamlar üçün
ilin ən uğurlu vaxtı payız və qış ayları olacaq. Həmin ərəfədə onlar
sağlamlıqlarının qayğısına qalacaq, şəxsi büdcələrini kifayət qədər
artıra biləcəklər. Onların xaircə səfər etmək planı da məhz bu ərəfəyə
düşür. Keçilərdən sonra ikinci ən çox ailə quranlar da məhz bu şəxslər
olacaq.
İT
Yeni eranın gəlişi vəfalı
İtlər üçün böyük əhəmiyyət kəsb edəcək. Hər yerdə hüquqlarının
tapdanmasından, irəli gedə bilməməsindən, "ac" qalmasından şikayətlənən
bu şəxslər yeni dönəmin başlanmasına böyük ümid bəsləyəcəklər. Təxminən
marta qədər istədiyini əldə edə bilməyən İtlər narahat olsa da, yeni
ilin düşərsiz olması barədə son qərar çıxarmağa tələsməməlidir. Ən azı
ona görə ki, bütün dəyişikliklər məhz yazın gəlişi ilə başlayacaq. İlk
növbədə yeni mühit və təzə müttəfiqlərlə rastlaşan bu kəslər həyata
baxışlarında daha diqqətli və daha qətiyyətli olacaqlar. Ola bilsin ki,
onlar tamam başqa meyllərə də istiqamətlənsinlər. Böyük biznesə
başlamaq, ictimai-siyasi proseslərə qoşulmaq məhz deyilən meyllərə şamil
oluna bilər.
İlin ortalarında artıq atacağı addımların
konturlarını müəyyən edən İtlər, həmişə olduğu kimi, yenə də çoxsaylı
rəqiblərlə rastlaşmalı olacaqlar. Amma əvvəlkilərdən fərqli olaraq,
onlar mübarizə aparmaqda tərəddüd etməyəcəklər. Bu zaman kəsiyinin son
və yeganə şans olduğunu düşündükləri üçün geri çəkilməyəcəklər. Tövsiyə
olunur ki, hətta uğursuzluqla rastlaşsalar belə, gərək onlar bunu
mətanətlə qarşılayalar və məğlubiyyət kimi qəbul etməyələr.
Payıza
doğru İtlərin şəxsi həyatında böyük dönüş yaranacaq. İstər ailə-sevgi
münasibətlərində, istərsə də fəaliyyət zəminində onlar istədikləri
zirvəni fəth edə biləcəklər. Astroloji göstəricilər istirahət üçün bu il
İtlərin az vaxtı olacağını bildirsə də, maraqlı insanlar arasında
mənəvi rahatlıq tapmaqla onlar xeyli məmnun qalacaqlar. Yay ayları
istisna olunmaqla, Keçi bu adamları pulsuz qoymayacaq.
QABAN (DONUZ)
Bəri
başdan qeyd edək ki, bu qrupa aid insanlar 2015-ci ildən kifayət qədər
razı qalacaqlar. Onların əksəriyyəti ötən Keçi ilindən (2003-cü il)
yarımçıq qalmış işlərini 12 illik fasilədən sonra, nəhayət ki, başa
çatdıra biləcəklər. Bu adamların ümid işığı artdığı üçün yeni ilin elə
ilk ayından perspektivli işlərin icrasına başlayacaq, nəzərdə tutduqları
ideyaların, demək olar ki, hamısını reallaşdıra biləcəklər.
Qarşılıqlı
münasibətlərdə Qabanlar son beş illə müqayisədə heç bir münaqişə ilə
üzləşməyəcək, ikibaşlı oyunlara cəlb olunmayacaqlar. Xaraktercə
humanist, xeyriyyəçi olan bu şəxslər ilin böyük hissəsini sakit və rahat
tərzdə başa vuracaq, yalnız yaradıcı işlərə həvəs göstərəcəklər.
Düzdür, payıza yaxın sevgi amilində müəyyən fəsadlarla üzləşəcəklər,
lakin onların zəngin həyat təcrübəsi və müdrikliyi bu xoşagəlməzliyin
uzunmüddətli olmasına rəvac verməyəcək.
Onu da qeyd edək ki,
2015-ci ildə ən az ailə quranlar da məhz Qabanlar olacaq. Şəxsi həyatda
böyük uğurlara yiyələnən Qabanlar ətraf mühitlərində müsbət aura
yaradacaq, öz həmkar və dostlarının rəğbət mərkəzində olacaqlar.
Vəzifədə isə yüksək pillələrə yetişmək şansı yaranacaq, əlbəttə ki, buna
həvəs göstərənlər mütləq yüksələcəklər.
Adətən büdcəsindən razı
qalan bu adamlar qarşıdakı ildə də öz ənənələrinə sadiq qalacaqlar.
Aprel-may aralığında qısamüddətli müayinə götürən Qabanlar il boyu
səhhətlərindən narazı qalmayacaqlar. Ümumiyyətlə, Keçi barəsində
danışdığımız şəxslərin ovqatını ideal həddə çatdırmağa çalışacaq.