İslam dini bu mövzuda qızlara xüsusi hüquq verir. Peyğəmbərimiz (s.ə.s.) buyurur: "Qızları evləndirərkən onların fikirlərini soruşun, "bəli" desə, nigah bağlayın, deməsə, bağlamayın". Səhabələrin "Utancaq qızların razılığını necə öyrənmək olar?" sualına isə Peyğəmbərimiz belə cavab verir: "Utancaq qızların susması razılıq əlamətidir".

Evlənən qızlar ömür boyu yaşayacaqları həyat yoldaşlarını seçmək hüququna malikdirlər. Yəni, bu məsələdə qızın rəyi mütləq öyrənilməlidir. Ancaq məsələ bununla qurtarmır. Burada valideyinlərin də hüquqları meydana çıxır. Əgər gənclər arasında uyğunsuzluq varsa, valideyinlərin müdaxilə hüquqları var. Bunun hikməti valideyinlərin daha təcrübəli olmaları ilə bağlıdır. Yəni gənclər hissə qapılaraq evlənmək barədə qərar qəbul edə bilərlər, ancaq bunda uyğunsuzluq görən valideyinlər övladlarının xoşbəxt gələcəyi üçün nigaha xitam verə bilərlər.