Dua sözünün mənası çağırış deməkdir. Dua edən öz Rəbbinə üz tutaraq Onu köməyə çağırır. Duaları qəbul edən, çağırışlara cavab verən yalnız Uca Allahdır. Dua ibadətdir. Odur ki, dua edən yalnız Allahdan istəməlidir. Allahdan qeyrisinə dua edib nəsə istəmək Allaha şərik qoşmaqdır. Allaha şərik qoşmaq isə günahların ən böyüyüdür. Dua insanı Allaha yaxınlaşdıran ən gözəl ibadətdir. Peyğəmbər salləllahu aleyhi və səlləm demişdir: “Uca Allah üçün duadan daha əziz heç nə yoxdur”. (ət-Tirmizi, 3370, 3696). Allaha doğru açılan əllər geriyə boş qaytarılmır. Allah Elçisi buyurmuşdur: “Həqiqətən, sizin Rəbbiniz həyalıdır, səxavətlidir; əllərini Ona doğru qaldırıb dua edən qulunun əllərini boş qaytarmağa həya edər”. (Əbu Davud, 1490). Allaha dua etdikdə üç şeydən biri baş verir. Peyğəmbər demişdir: “Hansı bir müsəlman, daxilində günah və qohumluq əlaqələrinin kəsilməsi olmayan bir dua edərsə, Allah ona üç şeydən birini verər - ya istədiyini ona bu dünyada verər, ya ona verəcəyini Axirət gününə saxlayar, ya da başına gələn bir müsibəti ondan uzaq edər”. Əbu Səid dedi: “Elə isə duaları çoxaldaq!” Allah Elçisi dedi: “Allah daha çox verəndir!” (əl-Buxari “Ədəbul-Mufrad” 710). Allahdan nə qədər istəmək lazımdır? Allah Elçisi demişdir: “Biriniz Allahdan istədikdə, çox istəsin, çünki o, öz Rəbbindən istəyir”. Tələsməyənin duası qəbul olunur. Peyğəmbər demişdir: “Biriniz “Mən dua etdim, amma duam qəbul olunmadı” deyərək tələsmədikcə, duası qəbul olunar”. (əl-Buxari, 6340). Ən fəzilətli dua hansıdır? Allah Elçisi demişdir: “Qulun “Allahım, Səndən dünya və axirətdə salamatlıq diləyirəm” (Allahummə inni əs'əlukəl-muafətə fid-dunyə vəl-əxirati) - duasından daha fəzilətli ediləcək heç bir dua yoxdur”. Xoş gündə Allahı xatırla ki, Allah da səni dar gündə xatırlasın. Peyğəmbər buyurdu: “Kimi sıxıntı və kədər anında duasının qəbul olunması sevindirirsə, qoy xoş günündə duasını çoxaltsın”. Rədd olunmayan dualar Allah Elçisi demişdir: “Üç dua rədd olunmur; valideynin övladı üçün etdiyi dua, oruc tutanın duası və müsafirin duası”. Allah Elçisi buyurdu: “İki dua rədd edilməz və ya nadir halda rədd edilər; azan verildikdə və döyüş meydanında düşmənlə qarşılaşdıqda edilən dua”. Həmçinin, Peyğəmbər dedi: “Və yağış vaxtı!” Allah Elçisi buyurdu: “Üç duanın qəbul olunmasına şübhə yoxdur; atanın, müsafirin və məzlumun duası”. Peyğəmbər demişdir: “Üç nəfərin duası rədd edilməz; Allahı çox xatırlayanın, məzlumun və ədalətli rəhbərin duası”.