Namazın düzgün olmasının əsas şərtlərindən biri niyyətdir. İnsan namaza başladığı andan onu bitirdiyi ana qədər niyyətini qoruyub-saxlamalı və dəyişdirməməlidir. Niyyət dəyişərsə namaz da öz mahiyyətini itirər. Çoxlarının inandığının əksinə olaraq, namazın niyyəti namaza başlayarkən dil ilə söylənilən sözlərdən ibarət deyil. Niyyəti dilə gətirmək vacib də deyil. Əsas odur ki, insanın qəlbində həmin niyyət olsun və dəyişməsin. Əsas olan da niyyətin sözlə ifadəsi deyil, niyyətin mahiyyətidir. Əgər insan namaza başlayanda qəlbində niyyətini düzgün etsə, məsələn, məğrib namazını qılarkən həmin günün məğrib namazını qıldığını qəlbindən keçirsə və namazın sonuna kimi bu niyyətdə qalsa kifayətdir. Hətta bu halda niyyəti dil ilə deyərkən səhv etsə də, eybi yoxdur. Məsələn, məğrib namazı qıldığını niyyət etsə, amma dildə işa namazı qıldığını söyləsə, bununla belə, 3 rükətlik məğrib namazı qılsa, namazı düzgündür və məğrib namazını düzgün qılmış sayılır