Lənkəran Ağır Cinayətlər Məhkəməsində İmişli rayon sakini, 22 yaşlı Elnur Əliyevin məhkəməsi başa çatıb.
Qadinlar.Biz-in məlumatına görə, hakim Nizami Quliyevin sədrliyi ilə keçirilən prosesdə Elnur Əliyev 10 il 6 ay müddətinə azadlıqdan məhrum edilib.
İttihama görə, Elnur Əliyev ötən ilin sentyabrın 20-də, gecə saat 02:00 radələrində İmişli şəhəri, 28 May küçəsində həyat yoldaşı, 25 yaşlı Vəfa Əliyevanı bıçaqlayaraq qətlə yetirib.
İttihama görə, fərdi ticarətlə məşğul olan E.Əliyev həyat yoldaşına Bakıya yük aparacağını deyərək axşam evə gəlməyəcəyini bildirib. İşi alınmadığından Elnur axşam evə qayıdıb.
Evinə daxil olan E.Əliyev yataq otağında arvadının dostu ilə intim əlaqədə olduğunu görüb. Elnur dostuna bir təpik vurandan sonra o qaçıb. Bundan sonra əlinə bıçaq alan Elnur qaçmaq istəyən Vəfanı küçədə ürəyindən bıçaqlayaraq öldürüb.