Öz peşəsi ilə əlaqədar həmişə rezin çəkmə geyinməli olan insanlar ayağa qulluq etməkdə çox çətinlik çəkirlər. Nəmişlik yerlərdə işləyənlər rezin ayyaqqabı geyinmək məcburiyyətindədirlər ki, bu da hava buraxmır. Buna görə də tər buxarlana bilmir. Yığılıb qalan tər isə dərinin yumşalmasına və göbələk xəstəliyinin əmələ gəlməsinə səbəb olur.

Yüksək nəmişlik olan yerlərdə işləmək ayaqların yaxşı mühafizə olunmasını tələb edir. Havanın təsirindən asılı olmayaraq yun corab geymək tövsiyyə olunur, o, təri özünə çəkir, ayaqların bişməcə olmasının qarşısını alır və ayaqları soyuqdan qoruyur. Uzunboğaz çəkmələr geniş olmalıdır ki, ayaq barmaqlarını tərpətmək mümkün olsun. Belə olduqda qan dövranı yaxşılaşır və ayağın donması ehtimalı azalır.

Rezin çəkmələrdə işlədikdə gigiyenik qaydalara çox diqqətlə riayət etmək lazımdır, çünki göbələk xəstəliyinin, irinli yaraların əmələ gəlməsi, ayaqların donması və bişməcə olması təhlükəsi var.

Ən əvvəl ayaqları sabunlu ilıq su ilə yumaq lazımdır. Ayaqları yumaq üçün yuyucu tozdan istifadə etmək olmaz, ona görə ki, bu tozdan ayaqların dərisi zəifləyə bilər.

Ayaqların gigiyenasından başqa corabların və çəkmələrin də təmizliyinə riayət etmək lazımdır. İşdən sonra ayaqlara hava keçirən çəkmə geymək, ya da ayaqlara hava dəyməsi üçün ayaqyalın gəzmək lazımdır. Çorabları günaşırı, ayaqlar çox tərlidirsə, gündəlik dəyişmək lazımdır. Çirk, tərli corablar ayağı qorumur, əksinə, özləri bakteriya mənbəyinə çevrilir. Nəm corabda qalmaq məsləhət deyil, çünki ayaqlar sürtülər və bişməcə əmələ gələr. Çəkmələri də vaxtaşırı sabunlu su ilə yumaq və yaxşıca qurutmaq lazımdır.

Ayaqların donması
Ayaqların donmasına hər şeydən əvvəl dar, çox da isti olmayan ayaqqabı səbəb ola bilər. Bu zaman donmaya qan dövranının pozulması, orqanizmin ümumi zəifləməsi, qan azlığı, pis qidalanma və s. səbəb ola bilər.
Soyuqdan qorunmağın ən mühüm vasitələrindən biri müvafiq geyinməkdir. Fiziki işlə, ya da idmanla məşğul olarkən yüngül, sakit işlə məşğul olarkən bir qədər qalın geyinməlisiniz. Ayaqlar donmuş vəziyətdəykən onları kartof qabıqları qaynadılmış su ilə 20-30 dəqiqə vanna etmək olar. Ayaqları qurulayıb donmaya qarşı məlhəm çəkilməlidir.

Ayaqların tərləməsi
Tərləyən ayaqlara qulluq zamanı ən əvvəl gigeyinik tədbirlərə diqqətlə riayət etmək vacibdir. Bunlara ayaqların gündə iki dəfə yuyulması, sonra tərə qarşı dərmanların çəkilməsi daxildir. Eləcə də həftədə bir dəfə ayaqlara sürvə, gicitkən cövhəri qatılmış vanna qəbul etmək tövsiyyə olunur. Bir neçə aydan sonra bu kursu təkrar etmək məsləhətdir.
Ayaqları tərləyənlər rezin ayaqqabı geyməməlidirlər. Yayda ayaqqabılarını geyməzdən əvvəl barmaqların arasını, ayaqların altını azca kirşanlamalıdırlar.
Tərləyən ayaqlar göbələk xəstəliklərinə qarşı dözümsüz olurlar, ona görə də xırda bir dəyişiklik görən kimi həkimə müraciət etmək lazımdır.