Əgər siz uşağınızın yaşıdları ilə ünsiyyət qurmadığını, həmişə kənarda dayandığını, hətta sizinlə də həvəssiz əlaqə qurduğunu hiss etmisinizsə, deməli, onunla ciddi məşğul olmaq lazımdır. Bu, uşaq qapalılığının əlamətləri ola bilər; buna etinasız yanaşmaq, tədricən öz-özünə keçəcəyinə, uşağınızın ətrafdakılarla ümumi dil tapacağına ümid bəsləmək olmaz.
Uşaq qapalılığı istər yeniyetməlik dövründə, istərsə də böyüdükdən sonra çox ciddi problemlər yarada bilər. Adətən, qapalı böyüyən insan sonralar əks cinsin nümayəndələri ilə münasibətdə problemlər yaşayır. Ö, qətiyyən əminlik hiss edə bilmir, özünə hədsiz dərəcədə tənqidi yanaşır və bunun nəticəsi olaraq tənhadır. Belə adamlara karyera qurmaq və bütövlükdə həyatda uğur qazanmaq çətindir.