İstəsək belə, dünyadakı bütün oyuncaqlari ala bilmərik. Amma bir sıra oyuncaqları öz əlimizlə düzəldə bilərik. Bu iş ilk baxışdan çətin görünsə də, əslində elə deyildir. Əl altında olan, bəzən bizə gərəksiz görünən, hətta atmaq istədiyiniz, gərəksiz saydığınız məişət əşyaları belə bu işdə köməyinizə çata bilər.
Hansı oyuncaqları düzəldə bilərik?
Gildən muncuq...
Gildən eyni boyda hamar kürəciklər düzəldərək ortasını diş çöpü ilə deşirik və bir neçə günlüyünə qurması üçün bir kənara qoyuruq. Muncuqlar quruduqdan sonra onları PVA yapışqanıyla örtmək və ya ağ yapışqanla əhatələmək lazımdır. Yapışqanın quruduğuna əmin olduqdan sonra isə muncuqları sulu boya və ya akvarellə rəngləyirik, daha sonra üzərini laklayırıq. Hazırladığımız muncuqları sapa düzmək üçün ilk növbədə uşağa iynə saplamağı öyrədirik ki, bu da uşaqda diqqətcilliyi artırır.
Sensor (toxunuşlu) torbalar...
İki eyni ölçüdə olan rezinli torba tikin. Hər torbaya eyni predmetləri, yəni cüt əşyaları qoyun. Məsələn, rezin oyuncaqlar, pozanlar, maşın təkərləri, maqnitlər, kublar, daşlar, düymələr, palıd qozaları. Ana öz torbasından müəyyən bir predmeti çıxardır, onun xüsusiyyətlərini sadalayır və sonra körpədən eyni predmeti öz torbasından tapmağı tapşırır. Uşaq eyni əşyani tapmaqda çətinlik çəkərsə, bu işi asandlaşdıraraq adi əşyaları iri oyuncaqlarla əvəz edərək oyunu onun özünün davam etdirməsini tapşırmaq olar. Bu uşaqda maraq yaratmaqla yanaşı onda oyuna həvəsi artırır.
Yumşaq kitabça...
Vərəqlər düzəltmək üçün eyni ölçülü parçalardan kvadratlar biçirik və kəsirik. Kvadratları öz təxəyyülünüzə arxalanaraq istədiyiniz applikasiyalarla, maraqlı və müxtəlif fiqurlarla bəzəyirik. Yumşaqlıq və qalınlıq üçün səhifələrin arasına sintepondan qat, vərəq əlavə edin. Hər səhifəni cibcikli, zamoklu və qaytanların köməyi ilə bağlanan etmək olar.
Əlavə vərəqli qutu və ya oyuncaq-içliklər...
Adi karton qutunu götürün və onda müxtəlif ( böyük və kiçik dairələr üçün) deşiklər açın. Belə oyuncaqlar uşağın xırda motoriki inkişafı üçün çox səmərəli vasitədir. Bundan başqa "böyük - kiçik" anlayışlarıının formalaşması üçün faydaı ləvazimatdır. Bu oyuncaq uşağın əllərini inkişaf etdirməklə bir növ motorik inkişafına təkan olacaqdır.
İnkişaf etdirici xalça.
Sintepon parçadan bir hissə götürün. O parçanı iki eyni ölçüdə olan digər parçanın üzərinə qoyaraq tikin ki, parça qalın olub xalçanı xatırlatsın. Bu xalça üzərində arzu etdiyimiz hər hansı cizgi filmini və ya hadisəni digər rəngli parça və məmulatlarla işləyə bilərik. Bu yaradıcılıq işinin meydana gəlməsində sizə müxtəlif çiçəklər, muncuqlar, düymələr və sairə kimi nəsnələr kömək ola bilər. Bu xalçayla oynamaq övladınızda yaradıcılıq və fantaziyani gücləndirməyə yardımçı olacaqdır.