Siçovullar (lat. Rattus) — siçankimilər fəsiləsindən gəmirici heyvan cinsi.
Bədəninin uzunluğu 10—30 sm olur. Quyruğu bədənindən bir qədər uzun və yaxud qısa, üstü pulcuq və seyrək tüklərlə örtülmüşdür. Qulaqları iridir.
Siçovullar hər 3—4 aydan bir çoxalır. Hər dəfə 5—15 bala doğur. Cinsi yetkinliyə 3—4 aylığında çatırlar. Siçovullar hər şey yeyirlər. Bir sıra ərzaq məhsullarını xarab edir, dəri və bu kimi materialları, binaları zədələyirlər. Bəzi qurd və yoluxucu xəstəlikləri yayırlar.
Siçovullara qarşı mexaniki, kimyəvi və bioloji üsullarla mübarizə aparılır. Siçovulların dərisi və xəzi ikinci dərəcəli xammal kimi itifadə olunur.