Qadınla.Com-un bu günki yazar qonağı Aynur Haqverdi-dir. Gəlin onu bilikdə tanıyaq.
- Elə ilk sualımız bu olsun. Aynur Haqverdi kimdir?
- Aynur Haqverdi kimdir? Maraqlı sualdır. Cavabını tapsanız, mənə də deyərsiniz. Çünki bu sualın cavabını mən də bilmirəm. Ümumiyyətlə, düşünürəm ki, biz insanlar kim olduğumuzu tam dərk edə bilmirik. Tutaq ki, qiyamət qopdu, dünya dağıldı, məhşərdə uca Tanrı bizə "Sən, kimsən?" sualını ünvanladı. Məncə, əksəriyyət bu sualın qarşısında susar, aciz qalar.
- Cavabınızdan görünür ki, qiyamətə, məhşərə, o dünyaya inanırsınız.
- İnanıb-inanmadığımı deyə bilmərəm. Amma bütün varlığımla arzulayıram ki, o dünya, cənnət, cəhənnəm, həqiqətən olsun. Siz sualı ünvanlamamışdan öncə cavablandırıram. Səbəbi, niyəsi çox sadədir. Bəziləri əlindəki pul-paradan, arxa-dayağından cəsarətlənib məzlum insanları əzir. Bu cür hadisələri siz də görürsünüz, mən də görürəm, o birisi, bu birisi də görür və təəssüf ki, həmişə görəcəyik. İstəyirəm ki, Allah o pis insanları: riyakarları, yalançıları, zalımları, haqqı tapdalayıb öz mənafeyini güdənləri cəzalandırsın.
- Niyə az yazırsınız? Az yazmağınızın səbəbi nədir?
- Az yazmaq. Maraqlı düşüncədir. Sizə bir söz deyim. "Səfillər" romanına kimi qalaq-qalaq əsərlər yazılmışdı və ondan sonra da milyonlarla əsər yazılıb, hələ də yazılır. Amma heç biri "Səfillər" ucalığına çata bilməyib, nəin ki, onu keçmək. Dediyim budur ki, kəmiyyətə yox, keyfiyyətə önəm verirəm.
- Niyə kitab çıxarmırsınız? Nəyi gözləyirsiniz?
- Bu haqda, hərdən, düşünürəm. Sonra da fikirləşirəm ki, kitab lazım deyil. Bizim cəmiyyətdə kitab oxuyanlar azdır, şeir oxuyanlar lap azdır, şeiri dərk edib oxuyanlar isə barmaqla sayılası qədərdir. Bir söz deyim, dünyada əsas şeir forması sərbəst şeir olsa da, bizim oxucuların əksəriyyəti sərbəst şeiri dərk edə bilmir. Düşünürlər ki, sərbəst şeir yazanlar istedadsızdır, zəifdir. (gülür) Ən acınacaqlısı bilirsiniz, nədir? Türkiyə seriallarına baxıb nələrisə götürürlər, amma Nazim Hikməti, Camal Sürəyyanı, Əziz Nesini, Orxan Vəlini və başqalarını oxusalar da, sərbəst şeiri qəbul edə bilmirlər. Gözəl yazılmış sərbəst şeirə şübhə ilə baxmaq Nazim Hikmətə şübhə ilə baxmaq kimi bir şeydir. Nazim Hikmət Ran nəin ki, əsrlər keçsə, düşünürəm ki, eralar da keçsə köhnəlməyəcək. Xarici şairlər Nazim Hikmət mükafatı alanda fəxr edirlər, amma biz nə vəziyyətdəyik.
- Daha çox hansı vəzndə yazmağı xoşlayırsınız?
- Əruz vəznində heç yazmamışam. Əruzu özüm üçün öyrənirəm, amma düşünürəm ki, heç vaxt əruzda heç nə yazmayacam. Əruz vəzni ruhuma toxunmur, bəlkə, haçansa fikrimi dəyişərəm. Bilmirəm. Hərdən görürsən hansısa ağıllı əruzda yazmayanlar şeiriyyatı bilmir deyir. Qəribədir. Amerikan, fransız, ingilis dahi şailər əruzdamı yazıb və yaxud əruzu biliblərmi, bilirlərmi?! (gülür) Mən heca vəznində və sərbəst şeir ölçüsündə yazıram.
- Şeirlər vəznini, janrını özü seçir?
- Bəli. Özləri seçir ki, mən hansı vəzndə, hansı formada yazılmalıyam və yazılacam. Yazar onların seçiminə hörmətsizlik edib, müdaxilə etsə sünilik yaranır. Şeir süni alınır. Nəsə çatmır.
- Son olaraq oxuculara sözünüz nədir?
- Kiməsə məsləhət verməyi sevmirəm. Düşünürəm ki, məsləhət vermək hardasa ağılsızlıqdır. Onsuz da, hamı içindən gələn kimi davranır. Amma oxuculara xoş diləklər edə bilərəm. Bu əziz Ramazan günlərində Allah hamımızın gözəl dualarını qəbul etsin. Can sağlığı versin. Hüzurumuz qaçmasın. Allah Vətənimizi qoruyan igid oğullarımızı qorusun. Amin. Belə.
:heart: :heart: :heart: Biri vardı, sol yanımı bahar edən. Biri vardı sevincimi qatar edən. Həyatımı cənnətməkan diyar edən biri vardı.
Indi yoxdur. həmin biri. Indi yoxdur.
Indi mənim sol yanımı şaxta kəsib, buz bağlayıb İndi mənim arzularım, naxoşlayıb. İndi mənim çaya dönmüş göz yaşımda axıb gedir bir zamanlar fərəh tapan ümidlərim.
Indi yoxdur həmin biri. Mən ölürəm diri-diri. Mən ölürəm diri-diri. :heart: :heart: :heart: Gəl sən mən ol, Mən də sən. Gəl ikimiz bir olaq Sən və mən biz olaq. Canımızdan əziz olaq. Hər axşam bir-birimizin Könlündə yatıb, Hər səhər bir-birimizin Qəlbində oyanaq. Gəl biz ulduz olub Bərq vuraq göy üzündə. Könlümüzdən səmaya Eşq yolu çəkək Kəhkəşan kimi. Gəl biz bulud olub Narın-narın yağaq İlk dəfə tanışdığımız yerə Ərməğan kimi. Gəl göyqurşağı olub Əlvan rəngə boyanaq Sən dəli könlün kimi Qırmızıya boyan. Mən isə masmavi olum Asiman kimi. Gəl sən Araz ol Mən Kür olum Qovuşaq. Suqovuşan kimi. Gəl... Gəl birlikdə dalğalanaq Birlikdə çalxalanaq Ümman kimi. Gəl külək olub Gəzək dünyanı, Eşqə boyayaq Bütün cahanı. Gəl qaranquş olub uçaq Sevginin, sevincin səsi tək, Baharın müjdəçisi tək. Gəl gəl birlikdə biz olaq Gəl birlikdə yaşa dolaq Birgə cavanlaşıb Birgə qocalaq. :heart: :heart: :heart: Şəhərimi tərk etmişəm Kəndinin xətrinə Ciyərlərim möhtacdır Nəfəsinin ətrinə Sevgimi hörürəm şeirimin hər sətrinə.
Pişiyim də küsüb məndən, Sən gedən o məşum gündən. Günəş çıxmır bu diyarda, Havada çən, ağlımda sən. Bayquş kimi tənhayam mən.
Sərçələr də yemir artıq, Səhərlər atdığım dəni... Quşlar da özləyir səni... Burada bir həssas ürək Bir qız var, gözləyir səni.