Harda bir yazıq görsən uşaq, tut qolundan qaldır. O böyük adamların kölgəsində söyüdlənən əncir ağaclarını sulayan insanlar görəcəksən uşaq, gözyaşları içində həngamələrə qaçan məhşəri izdihamlara dalacaqsan. Böyük deyə təlim edilən çılpaq krallara və çirkli tarixinə şahidlik edəcəksən insanoğlunun. Qan və zülmün ən naşı zamanlarına eyni düşdüyün quru quyularda daş axtaracaq, üstünə çökən qaranlıqlarda öz kölgəni unudacaqsan. Səssizliyin əlifbasıyla şəkillənən üzün, sənə belə qorxuducu gələcək uşaq. Kimsə tanımırkən səni, sən bilirkən özünü, unudacaqsan üzünə qorxuducu bir qarabasan kimi çökən qanlı döyüşləri. O döyüşlər ki nə qədər cəsur cəngavərlər gördü uşaq. Get buradan uşaq, sənə görə deyil bura. Buralar uşaqlara görə deyil. Uşaqların aid olmadığı çirkli bir dünya bura. Sizə görə bir dünya yaratmadıq. Yarada bilmədik. Uşaqların aid olduğu, xəyal bağçalarında cücərən döyüşsüz, qansız, dövüşsüz, şəfqətli bir diyar buraxa bilmədik. Get buradan.