Ey əzizim! Danışırsan doğru danış! Doğruluq kəramətdir. Qurtuluş doğruluqdur. Yalançı və hiyləgər şeytandır, lakin görünüşdə insandır. Yalan söyləyən kimsədən xeyir gəlməz. Boş sözlər və zarafatlar zərərə yol açar və ömrü hədər keçirərsən. Qeybət və dedi-qodudan uzaq dur ki, bunlar insanı xalqdan və haqqdan uzaq salar.

Allahı tanıyan kimsə insanlardan üzr istəyər. Üzr istəyənin üzrünü qəbul elə. Sənə əziyyət verəni bağışlayıb, ona yumşaq və gözəl sözlər söylə. Əlindən gəldiyi qədər qüsurlarını bağışla, ayıbları görməməzliyə vur. Bağışlamaq ehsanların ən gözəlidir.

Dil insanın tərəzisidir, alimi və cahili bir-birindən ayırır. Mömin insafla davranır. Əxlaqı gözəl olan xoş danışar. Çoxlu salam və şirin dil sevgiyə səbəbdir. Böyüklərin yolu-gözəl sözlü olmaq və açıq salam verməkdir. 

Yaxşılıq edənlə pislik edəni bir tutma. Yaxşılıq edəni dualarında unutma. Yaxşılığı unudub, qüsuru yadda saxlayan dost deyil, düşməndir. Dostunun xətasına dözməyən ölüm döşəyində tək qalar. Dostun gözün kimi olan insandır. İki dost həyatın bəzəyi və bəlada yardımçıdır. Səmimi görüşməklə yoldaşlıq davam edər. 

Mömin həlim, səlim olur.

Mömin yumşaq və həlim olur. Elm möminin əsas silahıdır. Elmin isə başı öyrənməkdir. Elmin zəkatı ağıllı insanlara elm öyrətməkdir. Elmin bəzəyi əziyyətə qatlaşmaqdır. Nemətin bəzəyi qohum-əqrabanı ziyarət etməkdir.

 

Ən əsası dilimizi yalandan, özümüzü çirkin əməllərdən qoruyaq. Haqqı batildən ayıraq. Şeytanın bizə düşmən olduğunu heç vaxt unutmayaq. Çünkü şeytan bizi yalnız uçuruma doğru sürükləyər. Allah ilə olaq! Yaradanımıza həmişə şükr edək! Çünkü bəlkə də bizim həyatımızı xəyalında yaşadanlar var. Bu günümüzə, bu anımıza daima şükr edək. Dilimizdən "Allah və Rəsulu Muhamməd (s.a.s)” , əlimizdən "Quran!” əksik olmasın. Amin.