Allahın bizə verdiyi
Nemətə yazığım gəlir.
Bircə-bircə əldən çıxan
Fürsətə yazığım gəlir.
Zülmə boyun əyə-əyə
Ritmi dəyişən ürəyə,
Boğazlarda düyünlənən
Nifrətə yazığım gəlir.
Ana torpağı düşmənin-
Ayağı altda əzilən,
Namusu əlindən gedən
Qeyrətə yazığım gəlir.
Ağızı tikən iynəyə,
Heç açılmayan çənəyə,
Ürəklərdə danışılan-
Söhbətə yazığım gəlir.
“Bir abbasım” deyə-deyə
Ağa dalıyca sürünən,
Minəninə boyun əyən
Millətə yazığım gəlir.
Bilmirəmki, mən neyləyim ,
Nə danışım, nə söyləyim?
Hər kəlmə başı dediyim
“Lənətə” yazığım gəlir.