Fransız
alimi Blez Paskal Konte iddia edir ki, Leonardo Da Vinçinin məşhur
"Mona Liza" əsərinin altında bir neçə təsvir aşkar edib. Onun sözlərinə
görə, portretin altında əsl Liza Gеrardinin təsvirini tapıb.
Şəklin
saxlanıldığı Luvr Muzeyinin əməkdaşları hələlik tədqiqatçının
bəyanatını şərh etməkdən imtina edir. Çünki Konte bu muzeyin tədqiqat
qrupunun üzvü deyil. O, sadəcə 2004-cü ildə sözügedən rəsmi tədqiq etmək
üçün Luvrdan icazə alıb.
Qeyd
edək ki, Paskal Konte on ildən artıqdır ki, "Mona Liza" əsəri üzərində
çalışır. Onun sözlərinə görə, müasir texnologiya rəsmin altında nə
gizləndiyini görməyə imkan verir:
"Şəklin
alt təbəqəsində hansı rənglərin və mənzərələrin olduğunu görə bilirik.
Texnologiyanın köməyi ilə şəkil soğan qabığı kimi təmizlənir və onu
başqa mənzərələr əvəz edir. Bu üsulla rəsmin yaranma xronologiyasını
bərpa edə bilərik”.
Kontenin
sözlərinə görə, gizli portretin altında azı iki təsvir var. "Mona Liza"
portretinin altında Cokondanın məşhur təbəssüm olmayan, bir az yana
baxan başqa bir qadın təsvir olunub.
Oksford
universitetinin professoru Martin Kemp yeni iddiaları qəbul etməyib. O,
Paskal Kontenin rəsmin altında Liza Gerardinin əsl təsviri olduğu
barədə fikrilə razılaşmayıb. Digər britaniyalı tarixçi Endryu Qrexem-Dikson isə, əksinə, fransız tədqiqatçını dəstəkləyib:
"Şübhəsiz
ki, bu, əsrin ən böyük kəşflərdən biridir. Əlbəttə, çoxları buna etiraz
edəcək. Axı rəsmin adını dəyişmək lazım gələcək. Belə çıxır ki, "Mona
Liza" portretinə əlvida deyib, başqa şəklin təsvir olunduğunu qəbul
edəcəyik”.
Xatırladaq
ki, Leonardo da Vinçinin möhtəşəm əsəri 1503-1505-ci illərə aiddir. Bu
portret italyan rəssamın ən məşhur əsərlərindən biridir.