Onda nə qorxum-hürküm,
Nə də bir dərdim vardı.
Yanımda dağ ürəkli,
Dağ kimi mərdim vardı.

Təyyarəmiz uçurdu,
Dağların zirvəsində.
Buludlardan yuxarı -
Üzü dağlara sarı.

Mən girdə pəncərədən,
Seyr edirdim dağlari.
Gözüm, könlüm gülürdü...
Mənə elə gəlirdi:

Ildirimdan qurşağlı
Buzdan papaqlı dağlar.
Bəd ayaqda əzizlər
Məni qoynunda saxlar.

Mən o zaman sevirdim,
Məhəbbətdən dəliydim.
Məni seçən mərdimin
Yeganə gözəliydim.

Bununçün də bilmirdim
Yollar təhlükəlidir.
Sevənlərin görəsən,
Hamısımı dəlidir???

Müəllif - Mirvarid Dilbazi