Çevrildim sənsizlik xəstəsinə mən,
Yem oldum hicranın pəncəsinə mən,
Əyildim ayrılıq kəlməsinə mən,
Ürək ağlamasın, axı neyləsin?

Bəlkə də vaxtında gəlmədim sənə,
Sənin istəyini vermədim sənə,
Özümü sevdirə bilmədim sənə,
Ürək ağlamasın, axı neyləsin?

Nə edim ürəyim səni istəsə,
Xəyalın gecələr yuxuma girsə,
Qismət daha səni görməməkdirsə,
Ürək ağlamasın, axı neyləsin?

Məni tərk edirsən, tərk edirsən sən,
Arxanca baxıram, çıxıb gedirsən,
Səni ayrılığla dəyişirəm mən,
Ürək ağlamasın, axı neyləsin?

Sevgi göz yaşıyla cücərər, bitər,
Ömür sənsiz ötər, gün sənsiz ötər,
Sevib ayrı qalmaq ölümdən betər,
Ürək ağlamasın, axı neyləsin?