Deyirsən , özgənin yarıyam artıq
Elə zənn edirsən , unutdum səni
Deyilən hər şeyə inanaraq sən
Bir dəfə arayıb sormadın məni .

Hər axşam bir başqa ağrıyır canım
Həsrətin bir başqa olurmuş , yarım
Əzəbsız keçmədi nə gün , nə ayım
Bir dəfə arayıb sormadın məni

Bilmədin vurdular , yaraladılar
Namərdlər dilində qaraladılar
Bilmədin sevgimi paraladılar
Bir dəfə arayıb sormadın məni .

Dağ idin arxamda nə tez dağıldın
Daha da yazılmaz bəxtimə adın
Niyə kor peşiman geri qayıtdın
Bir dəfə arayıb sormadın məni .

Məryəm Novruz