Sizin pərdənizi külək əsdirir,
Külək pəncərəni bu axşam salıb.
Bu yaz gecəsində arzu tutmağa,
Göydə nə Ay qalıb, nə ulduz qalıb.

Nə də ki sən varsan, dərd bölüşməyə,
Nə də ki sən varsan, eh, görüşməyə.

Bu yaz gecəsinin möcüzəsi yox,
Bu yaz gecəsində tamarzıyam mən.
Sinənin altında qasnaq bağlayan,
Könlünün ağrıyan yarasıyam mən.

Hamı xəbərsizdi, hamı biganə,
Heç kəsin vecinə gəlmirik daha.
Qonşunun ulayan alabaşının,
Dərdini bilirik...bilmirik daha.

Bu gün dərdimizin birazı getdi,
Yarısı yenə də qaldı sabaha.

Səfail Aqiloğlu