Belə keçir bu qış da,
Qar üstünü qar alır.
Çətindir qışda sevmək
Havalar tez qaralır.

Bilirsən də, gecələr,
Darıxdıqca susarsan.
Sükutuna nəğmə tək  
Durub, qulağ asarsan.

Ərköyün fikirlərin,
Yenə çıxar sözündən.
Hər şeyə göz yumarsan,   
Yuxu düşər gözündən.

Sancı verər sevgidən,
Vücudunun sol yanı.
Özünü aldadarsan,
Kəsməz ürək dərmanı.

Pəncərənin önündə 
Sağ‐sola qıvrılarsan.  
Səhərə iki saat
Qalmış, yatıb qalarsan...

Mirşən Xeyal