Dedilər: - Əhdini danır o ceyran;
Dedim: - Yalan olar! - Mən inanmadım.
Dedilər: - Qış gəlir, qayıt bu yoldan,
Əsdi yel, yağdı qar, mən inanmadım!

Dedilər: - Gözləmə o gülyanağı,
Dedim: - Ürəyimə çəkməyin dağı.
Dedilər: - Toyudur, bir axşam çağı,
Dindi saz, ötdü tar, mən inanmadım!

O vaxtdan ruhumu təklik sıxsa da,
Başqa bir gözəli salmadım yada.
Müqəssir sən oldun, çünki dünyada
Heç kəsə sonralar mən inanmadım!