O yalançı illər günə dəyməzmiş,

Gül verdim, verdiyim gülə dəyməzmiş,

Gözümdə çağlayan selə dəyməzmiş,

Heyf o sevgiyə, o məhəbbətə.

Bir dəfə ürəkdən gülə bilmədim,

Könlümü kimsəyə verə bilmədim,

Səndən başqasını sevə bilmədim,

Heyf o sevgiyə, o məhhəbbətə.

Sənsiz gecələrim yuxu bilmədi,

İçimdə alışan ahı bilmədi,

Mən bildim, sən bildin, çoxu bilmədi,

Heyf o sevgiyə, o məhəbbətə.

Özümün özümdən acıgım gəlir,

Dostlarım kədərli, düşmənim gülür.

Ölən sevgimizə yazığım gəlir,

Heyf o sevgiyə, o məhəbbətə.

Sultanlıq taxtımız devrildi necə,

Küləksiz, tufansız sovruldu heçə.

O sevgi nifrətə çevrildi necə,

Heyf o sevgiyə, o məhəbbətə.

Nüsrət Kəsəmənli