Dırnaqlarım
Saç-saqqalım uzanıb.
Divanda uzanmış ağsaqqal da
Dayanmadan deyinir:
Dilin yaman uzanıb.
Kimin nəyi uzanmır ki bu aralar?!
Allahın məsafəsi uzanır,
Zamanı qısalır,
Hər şey uzanır,
Hər şey qısalır.
Və ən pisi
Əlimi sənə uzada bilmirəm.
Əlim qısalıb.
Zaman da azalıb deyə
Vaxtım çatmır səni sevməyə.
Bu aralar çox məşğulam
Və təəssüf ki,
Əlim qısalıb.
Əlimi sənə uzada bilmirəm.
Ona görə
Bir Allaha dilim uzanır.
Siqaretim də azalır
Nəysə hər şey uzanır,qısalır və çoxalır.
Sonra yenə azalır.
Məndə şeirlərimi gərək azaldım.
Onsuz səsim çatmır sənə.
Ağsaqqal da düz deyir.
Gərək dilimi qısaldım…

Müəllif: Amin Medhi