Yenə də ağlıyır ürəyim mənim
Qəm yükü daşıyır kürəyim mənim
Sən idin qəlbimə dirəyim mənim
Qəlb uçar, olmasa o dayaq yenə
Getmə, gəl gözəlim, bir olaq yenə

Unutmaq olmur o şirin söhbətin
Bu sənsiz gecələr çətindir çətin
Dərmanım varsa da - saf məhəbbətin
Əvəzsiz günlərə qayıdaq yenə
Getmə, gəl gözəlim, bir olaq yenə

Sənsizlik dərdinə dözəməz Həsən
Öləcəm yaxında özüm deyəsən
Gedirsən, son dəfə heç olmasa sən
Gözünün ucuyla mənə bax yenə
Getmə, gəl gözəlim, bir olaq yenə

Qəlbimə dolduran daş mən olmuşam
Sanki öz özümə düşman olmuşam
Sevgilim, inan ki, peşman olmuşam
Yandıraq ürəkdə bir ocaq yenə
Getmə, gəl gözəlim, bir olaq yenə