Allah beşik göndərir
uyumağa, yatmağa,
Allah layla göndərir
qızılgülə batmağa.
Ömrü boyu böyüyür,
ucaldıqca ucalır,
İnsan oğlu can atır
Allahına çatmağa!
Allah bələk göndərir,
körpəni qucmaq üçün,
Allah qanad göndərir,
ucalıb uçmaq üçün.
Allah ağıl göndərir,
idrak, düşüncə verir,
Bağlanmış qapıları
açarsız açmaq üçün.
Əssə də soyuq külək,
yağsa da qar gözəldi,
Barlı payız, qarlı qış,
güllü bahar gözəldi.
Aç qoşa qollarını
Tanrı üçün, ey insan,
Allahın bəndə üçün
hər nəyi var, gözəldi!