Sən şüşə parçası, sən gümüş tozu
Hamının dünyası görünür səndə 
Həsrət saxlamısan, gör neçə gözü
Hamının xülyası görünmür səndə
 
Hər səhər, hər axşam sənə baxaraq
Gör neçə gözəl qız qismət arayır
Dikilib qarşına, əlində daraq
Bəlkə də sevgilim saçın darayır
 
Xoşbəxtlik iynədir, bəxtim samandır
Heç təəccüb eyləmə mənə baxanda
Nə yalan söyləyim, xeyli zamandır
Özümü görmürəm sənə baxanda
 
Mən sənə baxanda kədər görürəm
Mən sənə baxanda güzgü görmürəm
Mən sənə baxanda nələr görürəm
Üzümdə xoşbəxt bir cizgi görmürəm
 
Həyat vaxtından tez yorduqca məni
Mənim də həyatı yormağım gəlir
Sən məndən həmişə gözlə özünü
Səni çilikləyib qırmağım gəlir
 
Özün də bilmədən küsdürdün məni
İllər ötüşdükcə dərdsən, kədərsən
Bəlkə bağışlaram bir şərtlə səni
Anamı həmişə cavan göstərsən...
 
Rəvan Məmmədli