Günahımı yığın yığın yığdılar,
Başım üstə şimşək olub çaxdılar.
Düzgünümə yaman əyri baxdılar,
Şair olmaq istəmirdim ay Ana...

Bu dünyanın dərdin duyub dərindən,
Göz yaşıma baxa-baxa süründüm.
Bilmirdim ki soyuq olmaz sərindən,
Şair olmaq istəmirdim ay Ana...

Sən qadınsan sənə olmaz dedilər,
Zaman-zaman üzərimə gəldilər.
Hər kəlməmə hər sözümə öldülər,
Şair olmaq istəmirdim ay Ana...

Sözlərimdə dağı-dağa tay etdim,
Həsrətimi haray etdim hay etdim.
Sevincimi dostlarıma pay etdim,
Şair olmaq istəmirdim ay Ana...