Məndən soruş deyim sənə,
Görəcəksən faydasını.
Səhərəcən internetdə
Qız tutmağın qaydasını.

Məndən soruş anlamadan,
Durub dindən ötmək nədir.
Bankdan alıb krediti
Sonra Həccə getmək nədir.

Məndən soruş yol gedəndə,
Qız dalına düşmək nədir.
Verərkən şəhid xəbərin
Kanalı dəyişmək nədir.

Məndən soruş deyim sənə,
Savaşmaqdan qorxmaq nədir.
Əsgərliyə getməməkçün
Min hoqqadan çıxmaq nədir.

Məndən soruş tində durub,
Qızlara söz atmaq nədir.
Kasıbların, məzlumların
Günahına batmaq nədir.

Məndən soruş alçaqlığı,
Ya da üzə durmaq nədir.
Dostun ən pis zamanında
Kürəyindən vurmaq nədir.

Müəllif: Rüfət Sabirli