Qardaşı arvadını cinsi əlaqədən imtina etdiyi üçün öldürdü

Müəllif: Pure Love
Şərhlər: 2
Baxılıb: 6 356
Səs ver:
(səs: 2)
 
Azyaşlı uşaqlarının gözü qarşısında qardaşı arvadını xüsusi amansızlıqla qətlə yetirən şəxs 15 illik həbsxanaya göndərildi
Ağır cinayət törətməkdə təqsirli bilinən Gədəbəy rayonunun Qumlu kəndində anadan olmuş 1961-ci il təvəllüdlü Ramiz İmanıyevin cinayət işi üzrə məhkəmə başa çatıb. 
Ramiz İmanıyev Cinayət Məcəlləsinin 120.2.4-cü (xüsusi amansızlıqla və ya ümümi təhlükəli üsulla adam öldürmə), 133.1-ci (işgəncə vermə) və 127.2.2-ci (xüsusi amansızlıqla, zərərçəkənə ağır iztirablar verməklə və ya sifarişlə, habelə təqsirkar üçün aşkar surətdə köməksiz vəziyyətdə olan şəxs barəsində qəsdən sağlamlığa az ağır zərər vurma) maddələri ilə ittiham edilib.
Qatilin əvvəllər ittiham olunduğu cinayət işi...
İttihama görə, Ramiz İmanıyev Rusiya Federasiyası, Kazan şəhəri Vaxitov Rayon Məhkəməsinin 23 avqus 2002-ci il tarixli hökmü ilə Rusiya Federasiyası Cinayət Məcəlləsinin 111-ci maddəsinin 4-cü hissəsi və 150-ci maddəsinin 4-cü hissəsi ilə təqsirli bilinib 15 il müddətinə azadlıqdan məhrumetmə cəzasına məhkum olunub. O, Azərbaycan Respublikası Apelyasiya Məhkəməsinin 23 fevral 2006-cı il tarixli qərarı ilə Rusiya Federasiyası Cinayət Məcəlləsinin 111-ci maddəsinin 4-cü hissəsi və 150-ci maddəsinin 4-cü hissəsi ilə tövsif edilmiş cinayət əməlləri 2000-ci il tarixədək qüvvədə olmuş Azərbaycan Respublikası Cinayət Məcəlləsinin müvafiq olaraq 102-ci maddəsinin 2-ci hissəsinə və 215-ci maddəsinə uyğunlaşdırılaraq 10 il müddətinə azadlıqdan məhrum etmə cəzasına məhkum olunub və həmin məhkumluğu ödənilib. 
Məhkumluğu ödənildikdən sonra Gədəbəy rayonunun Qumlu kəndində yaşamağa başlayan Ramiz İmanıyev mütəmadi olaraq qardaşı arvadı Lətifə Sahibovanı döyməklə və zorakı hərəkətlərlə güclü fiziki ağrı verib, xüsusi amansızlıqla zərərçəkmiş şəxsin həyatı üçün təhlükəli olmayan, sağlamlığın uzun müddət pozulmasına səbəb olan qəsdən sağlamlığa az ağır zərər vurub.
Döymə, işgəncə...
Belə ki, o, qardaşı arvadı Lətifə Sahibovanı sərxoş vəziyyətdə həm özünün yaşadığı Gədəbəy rayonunun Qumlu yaşayış massivində yerləşən evində, həm də sonuncunun azyaşlı uşaqları ilə birlikdə həmin massivdə yerləşən Gədəbəy rayon Mədəniyyət və Turizm Şöbəsinin balansında olan Gədəbəy şəhəri, 20 Yanvar küçəsində yerləşən klubun binasında yaşayış üçün hazırladıqları otaqda mütəmadi olaraq döyüb, işgəncə verib.
O, 2012-ci ilin mayın 1-də tava ilə, 2012-ci ilin avqust ayının əvvəllərində isə çarpayının dəmir başlığı ilə, həmçinin 2012-ci ilin sentyabr ayının əvvəllərində yumruq və təpiklə döyərək Lətifə Salahovaya xəsarətlər yetirib. O, zərərçəkmişin sağlamlığına yüngül zərərvurma əlamətlərinə malik xəsarətlər yetirərək, ona güclü fiziki ağrı yetirməklə əzab verib. 
Qardaşı arvadını qolundan tutaraq yatağına çəkdi...
Bundan başqa Ramiz İmanıyev 2012-ci ilin iyul ayının ortalarında Lətifə Sahibovanın azyaşlı uşaqlarının gözü qarşısında klubun binasında onun yalvarmasına əhəmiyyət vermədən sağ qolunu buraraq qırıb. Həmin əməli ilə Lətifə Sahibovaya xüsusi amansızlıqla sağlamlığına az ağır zərər vurub. 
Ramiz İmanıyev əvvəllər müxtəlif vaxtlarda könüllü olaraq cinsi əlaqədə olduğu qardaşı arvadı Lətifə Sahibova ilə 13 sentyabr 2012-ci il tarixdə, saat 00:30 radələrində yenidən cinsi əlaqədə olmaq qərarına gəlib. 
Bu məqsədlə o, sərxoş vəziyyətdə cinsi əlaqədə olmaq üçün aynabənddəki divanda azyaşlı uşaqları ilə uzanmış Lətifə Sahibovanı alışqan vermək adı ilə qolundan tutaraq öz yataq otağına aparıb. 
Qardaşı arvadını cinsi əlaqədə olmadığna görə qətlə yetirdi
Lətifə Salahova uşaqların yatmadığını deyərək Ramiz İmanıyevlə cinsi əlaqədə olmaqdan imtina edib. Ramiz İmanıyev qardaşı arvadının cinsi əlaqədə olmaqdan imtina etməsinə əsəbləşib və onu öldürmək qərına gəlib. 
Qardaşı arvadını öldürmək məqsədilə əvvəlcə öz otağında Lətifənin bədəninin müxtəlif nahiyələrinə yumruq və təpiklə vurub. Lətifə Sahibova uşaqların qaldığı aynabəndə qayıdarkən onun arxasınca çıxıb. 
Ramiz İmanıyev öz hərəkətlərini davam etdirərək onun azyaşlı uşaqlarının gözləri qarşısında  əzab verməsini dərk edərək və onu öldürməməsi barədə Lətifə Sahibovanın yalvarışlarına əhəmiyyət verməyib. O, otaqda olan stulla Lətifə  Sahibovanıın bədəninin müxtəlif nahiyələrinə zərbələr endirib. Xəsarətlər nəticəsində Lətifə Sahibova dünyasını dəyişib.
Qatil 15 il cəza aldı
Bu dəhşətli cinayət işinə Gəncə Ağır Cinayətlər Məhkəməsində baxılıb. Hakim Elbəy Allahverdiyevin sədrliyi ilə keçirilən prosesdə təqsirləndirilən şəxs, zərərçəkmiş şəxsin hüquqi varisi ifadə verib.
Cinayət işinin dəlillərini araşdıran hakim heyəti qardaşı arvadını xüsusi amansızlıqla qətlə yetirən Ramiz İmanıyevin barəsində hökm elan edib. Məhkəmənin hökmü ilə Ramiz İmanıyev 15 il müddətinə azadlıqdan məhrum edilib. Ramiz İmanıyev cəzasının ilk 5 ilini həbsxanada, qalan hissəsini xüsusi rejimli cəzaçəkmə müəssisəsində çəkməsi qərara alınıb.
Qatil Gədəbəy polsinin vəzifəli şəxslərini məhkəməyə çağırdı
Birinci məhkəmə instansiyasının hökmündən Ramiz İmanıyev narazı qalıb. O, məhkəmənin həmin hökmü ilə razılaşmayaraq, apelyasiya şikayəti verib, cəzasının yüngülləşdirilməsini xahiş edib. 
Ramiz İmanıyev apelyasiya şikayətini belə əsaslandırıb ki, iş üzrə Gədəbəy rayon Polis İdarəsinin bir neçə vəzifəli şəxsi dindirilməlidir, o cümlədən polis rəisi, onun müavini, sahə inspektoru və başqa şəxslər məhkəmə iclasına dəvət edilməlidir. Bundan əvvəl 15 il həbsxana həyatı yaşadığı üçün həmçinin ona güzəşt edilməli və vəziyyəti yüngülləşdirilməlidir. 
Təqsirləndirilən şəxs: "Cinayəti törətdiyim zaman sərxoş olmuşam”
Onun şikayətinə Gəncə Apelyasiya Məhkəməsinin Cinayət İşləri üzrə Kollegiyasında baxılıb. Hakim Elşad Bayramovun sədrliyi ilə keçirilən prosesdə o, apelyasiya şikayətinin dəlillərini tamamilə müdafiə edib. Göstərib ki, əməllərindən peşmandır, əməlləri törətdiyi zaman sərxoş olub: 
"Sərxoş olmasaydım, belə hərəkətlərə yol verməzdim. Bir daha belə əməllərə yol verməyəcəyəm. Ömrümün qalan hissəsini həbsxanada keçirmək istəmirəm. Odur ki, apelyasiya şikayətim təmin edilməlidir”. 
Vəkil: "Ramiz İmanıyev yenidən həbsxana həyatı yaşamaq istəmir”
Təqsirləndirilən şəxsin vəkili Fuda İsgəndərov da apelyasiya şikayətinin dəlillərinə uyğun çıxış edib və cəzanın yüngülləşdirilməsini məhkəmə kollegiyasından xahiş edib. Vəkil bildirib ki, Ramiz İmanıyev əməllərindən peşmançılıq keçirir, uzun illər həbsxanada olub: 
"Ramiz İmanıyev yenidən həbsxana həyatı yaşamaq istəmir. Qanunla yol verilən hədlərdə ona güzəşt edilməsinin mümkünlüyü məhkəmə kollegiyası tərəfindən müzakirə edilməlidir”.
Prokuror: "Belə şəxsin barəsində hər hansı güzəştin edilməsi mümkünsüzdür”
Dövlət ittihamçısı Sadiq Əkbərov apelyasiya şikayətinin dəlilləri ilə razılaşmayıb. Dövlət ittihamçısı qeyd edib ki, apelyasiya şikayətinin təmin edilməsi üçün heç bir hüquqi, mənəvi əsas yoxdur: 
"Cinayət işi istintaq və birinci instansiya məhkəməsi tərəfindən kifayət qədər əhatəli araşdırılıb. Birinci instansiya məhkəməsi tərəfindən cəza təyin edilərkən də cinayətin xarakteri, ictimai təhlükəlilik dərəcəsi, məhkumun şəxsiyyəti, həmçinin təyin olunmuş cəzanın onun islah olunmasına təsir dərəcəsi nəzərə alınaraq qanuni və əsaslı nəticəyə gəlinib. Ona qanuni cəza təyin edilib. İşin materiallarından məlumdur ki, Ramiz İmanıyevin əməllərində cinayətlərin xüsusi təhlükəli residivi var, məhkumluğu ödənilməmiş yenidən cinayət törədib. Belə şəxsin barəsində hər hansı güzəştin edilməsi mümkünsüzdür. Birinci instansiya məhkəməsinin hökmü qanuni olduğundan apelyasiya şikayəti təmin edilməməli, hökm dəyişdirilmədən saxlanılmalıdır”. 
Qatilin cəzası qüvvəsində qaldı
Bütün tərfləri dinləyən hakim heyəti sonda yekun qərarını açıqlayıb. Qərara görə, təqsirləndirilən şəxsin apelyasiya şikayəti təmin edilməyib və Gəncə Ağır Cinayətlər Məhkəməsinin hökmü dəyişdirilməyib.
Artıq Ramiz İmanıyevin barəsində çıxarılan hökm qanuni qüvvəsinə minib. Buna görə də qatil cəzasını çəkməsi üçün Ədliyyə Nazirliyinin Pentensiar Xidmətinin Qobustan Qapalı Həbsxanasına göndərilib. 
Hacı Zeynalov
(səs: 2)
Şərhlər: 2
Baxılıb: 6 356
Geriyə
Hörmətli Qonaq, saytda şərhləri oxumaq, şərh yazmaq, xəbər göndərmək üçün QEYDİYYATDAN keçməyiniz lazımdır.

İnformasiya

Qonaq qrupunda olanlar istifadəçilər bu xəbərə şərh əlavə edə bilməz.
Bölümlü Hekayələr

Müzakirələr

Bürclərlə BİZ

Xəbər lenti

Astrologiya

Qadın testləri