Bu gün Bakıda metro stansiyalarının giriş və çıxışlarında polis əməkdaşları daha çox nəzərə çarpırdı
Bunun səbəbi bir neçə gün əvvəl mediada martın 1-də metronun "28 may" stansiyasının açılışı münasibətilə bir qrup insanın "Metroda şalvarsız aksiya" keçirəcəyi barədə xəbərlərin yayılması idi.
Lakin gözlənildiyi kimi aksiya yer altında deyil, yerin üstündə, özü də Bakının düz mərkəzində - "Torqovı” kimi tanınan ərazidə, Nizami küçəsində keçirildi. Aksiyada iştirak edənlərin demək olar ki, hamısı gənclər idi.
Fləş-mob iştirakçıları skamyada oturduğu yerdə, küçədə gedərkən və ya ticarət mərkəzində ətrafındakılara heç bir fikir vermədən birdən-birə şalvarlarını çıxarmağa başlayıblar. Onların bu hərəkətinə sərt reaksiya verənlər də olub, maraqla qarşılayanlar da (ANS TV).