İlin ən səbirsizliklə gözlənilən mərasimlərindən biri Kann kinofestivalının açılış mərasimi reallaşıb.

Qadınlar.Biz xarici mətbuata istinadən xəbər verir ki, bu məqsədlə Fransanın Kann şəhərində təhlükəsizlik qüvvələri artırılıb.

67-ci Kann Beynəlxalq kinofestivalı Fransa rejissoru Olivye Daanın "Monako şahzadəsi” filminin nümayişi ilə açılıb. Bu il festivalı fransız aktyoru Lamber Vilson aparacaq. Tədbirdə aktyorlar qırmızı xalıdan keçərkən göz qamaşdırıb. Onlar arasında Nikol Kidman, Bleyk Layvli və digər tanınmışlar olub.

18 filmin iştirak etdiyi müsabiqəyə fransız aktrisası Karol Buke, Uillem Defo (ABŞ), Qael Qarsia Bernal (Meksika), Çon Do En (Cənubi Koreya), Leyla Hatəmi (İran), Sofiya Koppola (ABŞ), Tszya Canke (ÇXR) və rejissor Nikolas Vindinq Refn (Danimarka) münsiflik edirlər. Münsiflər heyətinə yeni zelandiyalı rejissor Ceyn Kempion başçılıq edir.

Bundan əlavə, festival çərçivəsində qısametrajlı filmlərin müsabiqəsi də keçiriləcək. Rejissor Sergey Pikalovun Rusiya və Azərbaycanın birgə istehsalı olan və Yer üzündə yaşayan sonuncu İkinci dünya müharibəsi veteranından söz açan "Sonuncu” ibrətamiz sənədli filmi də müsabiqə iştirak edir. Filmdə baş rolda 66 yaşlı azərbaycanlı aktyor İdris Rüstəmov çəkilib.

Qeyd edək ki, festival mayın 14-dən 25-dək davam edəcək. Qaliblərin mükafatlandırılma mərasimi mayın 24-də reallaşacaq.