Onları şou- biznes aləmində çox küsüb-barışan görmüşük. Biri-biriləri ilə qol-boyun olub öpüşüb-görüşən vaxtları da olur, küsüb bir-birinə arxa çevirən vaxtları da. Amma bu dəfə onları ancaq bir ampulada, mehriban, biri-birilərinə qol-boyun, sarmaş-dolaş görəcəksiniz.
Layihənin budəfəki qonaqları ATV telekanalının parlaq simaları Cavid Gül və Nərgiz Məmmədovadır.
- Bu şəkilləriniz yayıldıqdan sonra hər kəs elə biləcək sevgilisiz.
Cavid: Şvartsnegger Silvester Stallonenın şəkilləri artıq 40 ildir ki, yayılır hələ ki, heç bir söz-söhbətə səbəb olmayıb. Mənim boyum balacadır mən Stallone ola bilərəm, Nərgiz isə Şvasneqer.
Nərgiz gülərək cavab verir: Onlara lazım deyil ki, biz hansısa foto ilə onların qarşılarına çıxaq. Özləri danışacaqlar. Qısacası Cavid cavab verdi, mən onunla razılaşıram.
Cavid: Nərgiz, yəni razıdır ki, o Şvartsneggerdi.
Nərgiz: Eybi yox ona da razıyam, təki danışmayım (gülür-red)
- Bir müddət əvvəl də şəkilləriniz yayılmışdı və müxtəlif məlumatlar yazılmışdı.
Nərgiz: Bəli, qeyri-peşəkar jurnalistlər tərəfindən yazılmışdı. Belə bir şey olanda çox əsəbiləşirəm. İnstagram sosial şəbəkəsindən, şəkillərimizi götürüb, yayırlar və həqiqəti əks etdirməyən şeylər yazırlar.
Cavid: And verirəm sizi wi-fi –a bir də belə hərəkət etməyin. Sizi görüm "wi-fi”nız kəsilsin. Sizi görüm ki, klaviratura üzünə həsrət qalasınız, barmaqlarınız qırılsın.
Nərgiz: Həqiqətən olmaz belə. İki qoşa şəkilimizi qoyub, yazırlar ki, sevgilidirlər. Axı bu nə dərəcədə düzgündür?
Cavid: Əslində mənə görə belə yazırlar, sənlik bir şey yoxdu.
Nərgiz: Hə, hə . Deməli əziz oxucular Cavid belə şeylərə görə çox narahat olur, şəxsi həyatında dəhşətli problemlər yaşayır.
Cavid: Nərgiz onu demirəm, mənimlə kim şəkil çəkdirir onunla adım çıxır...
- Amma deyirlər küsülü idiniz, bir az olar barışmısınız.
Cavid: Yalan, yalan söylüyorsun (gülürlər-red)
Nərgiz: Orada yazılan hər şey yalan idi. Deyirlər biz bərabər Türkiyədə olmuşuq, amma bu da yalan idi. Yox niyə küsək ki...
Cavid: Biz Nərgizlə dünən gecə barışmışıq (gülür-red)
Nərgiz: Əslində Cavidlə 2008-ci ildən münasibətimiz yaxşıdır, bu günə kimi də elə davam edir.
Cavid: Dostluq münasibəti, onu da vurğula ay Nərgiz
- Yəni, dostluq sevgiyə çevrilə bilməz?
Cavid: Niyə olmur ki, həyatda hər şey ola bilər. Amma...
Nərgiz: Mənim ailəm bilir ki, Cavid mənim dostumdur, o istədiyi vaxt bizə gəlib-gedə bilər. Ailəvi dostuq. Səmimi yoldaşıq. Cavid anamı da, bacımı da tanıyır. Cavid mənim üçün sırf dostdur.