Sıxır məni sıxıntıar,
Illərdən yığılıb qalan
Kədər yüklü yığıntılar;
Istirahət günlərindən sonra gələn
Iş qayğısı,
Məni başa düşməyənlər çevrəsində
Başa düşən bir nəfərin
Yaxınımda olmaması,
Dəli külək qardaşımın gətirdiyi,
Qara bənzər yağıntılar,
Sıxır məni sıxıntıar...
Saf məhəbbət hissləriylə
Dolu günlərin həsrəti,
Ehtiraslı sevgilərin sonuna olan
Nifrətim,
Qızıl yüklü eşşəklərin
Bu nüfuzu, bu qüdrəti,
Batıb gedən tapıntılar,
Sıxır məni sıxıntıar...
Qəfəsdəki quşlarımın çırpıntısı,
Yerlərinin dar olduğunu göstərən,
Şeytanların üzündəki üzlükləri,
Bir vəfasız yar olduğunu göstərən,
Göydən yerə baxanda da,
Ədalətsiz ziddiyyətin var olduğunu göstərən
Girintilər, çıxıntılar,
Sıxır məni sıxıntıar...
Ulduzu bir nöqtə boyda görən
Gözün acizliyi,
Əyrilərə həsəd ilə baxan,
Düzün acizliyi,
Aşiqin əlçatmaz yara baxan
Həzin acizliyi,
Ürəyimdə hələ neçə şeirlərə
Mövzu verən sıxıntı var...
Sıxır məni sıxıntıar...