ABŞ-ın ən məşhur aktrisalarından biri, 84 yaşlı Debbi Reynolds vəfat edib. O, qızı, tanınmış aktrisa Kerri Fişerin ölümünün ertəsi günü dünyasını dəyişib.

BiG.AZ bildirir ki, qocaman aktrisanın oğlu Todd Fişerin dediyinə görə, anası ilə birlikdə bacısının dəfn mərasiminə hazırlaşırdı. Lakin dünən Debbi Reynoldsun vəziyyəti qəflətən pisləşib və onu insult diaqnozu ilə hospitala aparıblar.

Əksər rolları komediya filmlərində olan Debbi Reynolds "Singing in the Rain" filmindəki rolundan sonra tanınmışdı. Onun "The Unsinkable Molly Brown", "Tammy and The Bachelor", "Goodbye Charlie" və "The Pleasure of his Company" filmlərindəki rolları da çox uğurlu alınmışdı.

İlk əri Eddi Fişerlə aktrisa 1959-cu ildə boşanmışdı. Səbəb Eddi Fişerin aktrisa Elizabet Teylora vurulması idi. Debbi Reynolds 1960 və 1984-cü illərdə də ərə getmişdi.

Debbi Reynoldsun tərəf-müqabilləri arasında Gene Kelli, Frenk Sinatra, Toni Körtis, Donald O-Konnor, Fred Aster və Dik van Dayk olmuşdu.\milli.az\