Xəmir üçün:
210 q un
1 yumurta
50 q şəkər pudrası
100 q yağ
1 çimdik duz (pudra kimi)
1/4 çay qaşığı qabartma tozu
İçi üçün:
200 q kəsmik
40 q şəkər tozu
30 q un
20 q xama
1/2 yumurta sarısı (o biri yarısını dərhal 1 xörək qaşığı ilıq su ilə qarışdırın ki, qurumasın, kökənin üstünə vurmaq üçün)
Vanil (istəyə görə)
Hazırlanması:
İçi əvvəlcədən hazırlayın, bu, şəkər tozunun yaxşı əriməsi üçün lazımdır (yaxud da şəkər pudrası istifadə edin): bütün ərzaqları mikserlə yaxşıca qarışdırın. Xəmir: ləyənə yumşaldılmış yağ, yumurta, duz, şəkər pudrası qoyub çalın. Şəkər tam əriyəndən sonra un və qabartma tozu əlavə edin.
Kündə tutun, 6 yerə bölün (hərəsi 70 q). Hər birini un səpilmiş masanın üstündə ellips formasında yayın. Hərəsinin içinə bir qıraqdan 45 q iç qoyun. Xəmirin qalan hissəsini üzərinə qatlayın (için az bir hissəsi görünsün).
Perqament döşənmiş formaya düzün. Su ilə qarışdırılmış yumurta sarısını üzərlərinə çəkin.
200 dərəcə qızdırılmış sobada 25 dəqiqə bişirin.