Tərkibi: xəmir: 100 q yumşaq kərə yağı 100 q şəkər tozu 1 iri yumurta 100 q un 1/2 ç.q. qabartma tozu 50 ml süd 1/2 ç.q. vanil cövhəri
iç: 2 ortaboy banan
karamel: 50 q kərə yağı 150 q qəhvəyi şəkər tozu 1/2 ç.q. darçın
Hazırlanması: Xəmir: kərə yağını şəkər tozu ilə ağarıb şişənəcən çalın, yumurta əlavə edib bir daha çalın, vanil cövhəri qatın. Unu qabartma tozu ilə ələyin. Yarısını xəmirə qatın, qarışdırıb süd tökün, bir daha qarışdırıb unun qalanını əlavə edin. Yaxşıca qarışdırın.
Karamel: tavaya kərə yağı və şəkər tozunu tökün, orta itilikli odda şəkər dənələri əriyib eynicinsli kütlə alınanadək qızdırın, darçını əlavə edin.
Karameli formanın dibinə tökün. Üzərinə 0,5 sm qalınlıqda doğranmış bananı düzün. Bananın üzərinə xəmiri bərabər yayın.
180 dərəcə qızdırılmış sobada 20 dəqiqə bişirin. Formada 3 dəqiqə soyudandan sonra qaba tərs çevirib süfrəyə verin.