Tərkibi:
200 ml isti süd
50 q marqarin
2 yumurta (biri xəmirə, biri üstünə)
3 x.q şəkər tozu
3 x.q bitki yağı
1 paket vanilli şəkər tozu
1 ç.q quru maya
2-2,5 st un
0,5 ç.q duz
Mürəbbə

üzəri üçün:
1 x.q kərə yağı
2-3 x.q un
1 x.q şəkər tozu

İsti süddə mayanı və 1 ç.q. şəkər tozunu əridin, 2-3 x.q. unu əlavə edib qarışdırın, 10 dəqiqə saxlayın.

Marqarini əridin, yumurta, şəkər tozu, vanil, duz və bitki yağı əlavə edib yaxşıca qarışdırın, sonra baratanı da əlavə edib un qataraq xəmir yoğurun. Qazanın içini bitki yağıyla yağlayın, xəmiri içinə qoyun, qapağını örtüb isti yerdə 1-1,5 saat saxlayın. Xəmir gələndə əllərinizi yağlayıb 11-12 kündə tutun.

Tavanı kərə yağı ilə yağlayın. Hər kündənin ortasına 1 ç.q. mürəbbə qoyun. Əgər mürəbbə çox durudursa, biraz un, yaxud narın suxarı əlavə edin. Xəmirin kənarlarını bitişdirin (yağ səbəbindən bitişmirsə, un vurun). "Tikiş" yeri aşağı olmaqla bir-birindən azca aralı siniyə düzün. Hamısının kənarına bitki yağı çəkin (şişib bitişəndə ayırmaq asan olsun).

Hamısını yerləşdirəndən sonra üzərinə qida plyonkası çəkin, 20 dəqiqə gözləyin.
Üzəri üçün un, kərə yağı və şəkər tozunu qarışdırıb ovun. Sobanı 200 dərəcədə qızdırın. Şişmiş bulkaların üzərinə çalınmış yumurta çəkin, üzərinə ovuntunu səpin. Sobada üstü qızarınca bişirin.

Nuş olsun!