Müasir idarəetmə yanaşmasına görə şirkət və təşkilat idarəçiliyində mükəmməl liderlərə ehtiyac vardır. Şirkətlərin idari sahədə müvəffəq olması müasir iş və xidmət metodlarını uğurla idarə etmələrinə bağlıdır. Bunun üçün sadəcə idari və təşkilati sahədə deyil, nəzakət və davranış qaydaları mövzusunda da bilik və bacarığa ehtiyac vardır.
İş həyatında da münasibətin əsasını nəzakət və davranış qaydaları təşkil edir. İş yerindəki qaydalar iş yoldaşlarınıza və əməkdaşlarınıza qarşı hörmət göstərmək deməkdir. Eyni zamanda nizam-intizama dəyər vermək işçiyə, təşkilata və dövlətə olan hörməti artırar.
Bundan başqa davranış qaydalarına riayət etməniz iş görüşmələrində, ya da iş müraciətlərinizdə başqaları üzərində buraxdığınız təəssürata əsaslı şəkildə təsir edəcəkdir.
Qiyafə qaydasına və xarici görünüşünüzə diqqət edin! İş yerinə uyğun və səliqəli geyinin. Əgər müəyyən bir qayda yoxdursa, üst pillə idarəçilərdən nümunə götürün. Yadda saxlayın! İnsan görünüşü ilə qarşılanar, danışığı ilə yola salınar.
Mümkünsə işə 10 dəqiqə tez gəlin. İşə başlamadan əvvəl oturduğunuz yeri – otağı səhmana salın və görəcəyiniz işlər planına nəzər salın.
İncə və nəzakətli olun! Ana dilinizdə mükəmməl, bildiyiniz xarici dildə gözəl üslubda danışın.
İş yoldaşlarınız və müştərilərlə danışarkən onlarla rahat münasibət qurmağa, həmçinin fikrinizi, tam aydın və konket şəkildə izah etməyə çalışın.
Rəsmi və ya qeyri-rəsmi gələn qonağa qısa-konkret, tam və dolğun cavab verməyə çalışın. Kifayət dərəcədə izah edə bilmədikdə cavab verə biləcək adama yönəldin.
Öz işinizi mükəmməl və qüsursuz şəkildə yerinə yetirməyə çalışın. Müəssisənin işini səmərəliləşdirmə, asanlaşdırma barədə fikriniz varsa, bunu rəisinizə söyləyin.
İtaət çox vacibdir. Bütün qaydalara və özünüzdən yuxarı vəzifədəki adamların sözlərinə ciddi riayət edin. İşçi-müdir arasındakı pərdəni daima örtülü saxlayın.
Öz işinizi bitirdikdən sonra iş yoldaşlarınıza da kömək edin. Hətta fədakarlıq edərək xəstə, zəif və az bacarıqlı olanların yarımçıq qalan işini siz görə bilərsiniz.
İdarənizdə, otağınızda sizə lazım olan və səlahiyyətiniz çatan bütün sənədlərin, kitabların, hesabatların və s. harada olduğunu bilin. Bu sizin vəzifənizdir.
Bütün iclaslara (konfranslara) tam vaxtında gəlin, gecikməyin.
İdarənin və ya iş yerinin problemləri və onların həlli ilə əlaqədar təkliflər irəli sürməniz düşüncəli bir işçi olduğunuz təsirini bağışlayar.
İclas əsnasında qələm, kağızlar və s. digər ofis əşyaları ilə oynamayın.
Çox vacib olmadıqda iclas əsnasında telefonunuzu bağlı saxlayın. Əgər bağlaya bilməsəniz, o zaman qapının yaxınına oturun. Beləcə telefonunuz çağırdıqda səssizcə çölə çıxa bilərsiniz.
Oturuşunuza və duruşunuza diqqət edin – kresloya uzanmayın, stulunuzda geriyə söykənməyin və ya qollarınızı sinənizin üzərində qovuşdurmayın.
İş əsnasında verilən tapşırıqları, adları, telefon nömrələrini, tarixləri qətiyyən unutmayın.
Yazılarınızda və sənədlərlə işlərkən xətaların olmamasına çalışın.
Hər zaman təqdim edildiyinizdə və ya tanış edildiyinizdə ayağa qalxın.
Siz insanları tanış edəcəyiniz zaman daha vacib olan insanın adını əvvəl söyləyin.
Telesekretarınıza adınız, vəzifəniz, şöbəniz və nə vaxt imkanınız olduğuna dair qısa və konkret məlumat verin ki, o da gələnləri lazımi qaydada məlumatlandırsın.
Axtardığınız adama mesaj qoyarkən adınızı və soyadınızı, niyə axtardığınızı və telefonunuzu bildirin.
Bir yerə gedərkən, səlahiyyətiniz xaricində bir şeyi etmək istərkən özünüzdən yuxarı vəzifədə olanlardan izn (icazə) alın. Lazımi məlumatı iş yoldaşlarınıza da verin.
Başqa yerə göndərilərkən təşkilatı təmsil etmək, idarənin hörmətini qorumaq əsasdır. Bütün hərəkətlərinizlə təmsil etdiyiniz şirkətin nüfuzunu yüksəltməyə çalışın.