Məlum olduğu kimi hər bir Azərbaycan vətəndaşının sərbəst və öz seçdiyi şəxslə evlənmə hüququ var. Müasir dövrümüzdə bir çox sevən oğlan və qızın ailə həyatı quraraq ömrünün sonuna kimi xoşbəxt yaşadıqlarını deyə bilərik. Amma bunu da demək olmaz ki,hər sevən cütlük ailə səadətinə nail olur. Təəssüf ki,bir-birini sevən iki gəncin müxtəlif səbəblərdən ayrıldığını,yaxud xoşbəxtliyini itirdiyini,hətta cinayət hadisələrinin də şahidi oluruq. Ailə həyatı qurarkən təkcə sevgini əsas götürmək də olmaz, ailə məsləhəti də nəzərə alınmalıdır.Bəzən valideynin məsləhətinə qulaq asmamaq sonda fəlakətlərə yol açır.
Təəssüf ki,müasir dövrümüzdə də köhnə adət - ənənələr qalmaqda,fəaliyyət göstərməkdədir. Bunlardan biri də sırf məntiqə əsaslanan evliliklərdir. Xüsusən rayon və kənd yerlərində rastlaşdığımız bu cür evliliklər sadəcə valideynin tələbi ilə həyata keçir. Buna misal olaraq qohumun qohum ilə,tanışın tanış ilə ailə həyatı qurmasını göstərmək olar. Sevgi əsasında qurulmayan bu evlilik ailədə daim söz-söhbətin olmasına,oğlanla qızın bir-birine nifret etməsinə,təəssüf ki, bəzən xəyanətə və cinayətə yol açır. Xüsusən qızların son zamanlaradək bu cür evliliyə məcbur edildiyi görünür. Bəzən heç valideyn fikirləşmir ki,bəlkə qohum dediyi bu oğlan narkaman,ya da əxlaqsız birisidir? Eyni zamanda ailəsinə qarşı çıxıb sevdiyi şəxslə evlənmək istəyən xanım ya bəy də eyni zamanda,düşünməlidir ki,bəlkə sevdiyi qumarbazdır? Ən dəhşətlisi sevdiyi oğlan bir qızın başqasına ərə verilməsidir bəlkə də. Təəssüf ki, bəzən valideyn zorakılığı gənc qızların intihar etməsinə, gənc ömrünə qıymasına səbəb olur.
Sonda onu deyə bilərəm ki,ailə həyatı qurarkən valideyn məsləhəti ilə sevgi vəhdətdə olmalıdır. Valideynlə övlad arasında münasibətlərin pozulması sonda heç vaxt düzəlməyəcək ailə münaqişələrinə,aradakı hörmət ve dostluğun sonuna gətirib çıxara bilər.
Əbülfəz Kərimov