Kreml pəhrizi sırf zülal pəhrizi olub, ətli qidaların üzərində qurulmuşdur və dünyada ən paradoksal pəhriz hesab edilir. Ona bəzən “astronavt pəhrizi” də deyilir. Həmin pəhrizlə arıqlamaq istəyənlər mütləq ət yeməlidirlər. Pəhrizin üstün cəhəti bunlardan ibarətdir: real arıqlama, qidaların miqdarına məhdudiyyətin qoyulmaması və psixoloji rahatlıq. Onun əsas işləmə prinsipi bundan ibarətdir: rasionda tərkibində həddən artıq çox karbohidrat olan qidalar məhdudlaşdırıldığından orqanizm enerjini öz daxili ehtiyatları, yəni piy toxumasının parçalanması hesabına əldə edir. Kreml pəhrizində əsas məsələ nə qədər qida yeyilməsi deyil, nə qədər karbohidrat qəbul edilməsidir.

Arıqlamaq üçün gün ərzində 40 qramdan artıq karbohidrat qəbul etmək olmaz. İşi bir qədər də asanlaşdırmaq üçün bu rəqəmi şərti vahidlə əvəz etmək olar. Pəhrizdə 1 qram karbohidrat 1 vahid qəbul edilir. Ona görə də pəhriz zamanı çalışmaq lazımdır ki, qəbul edilən qidaların gündəlik miqdarı həmin qayda ilə 40 xalı keçməsin. Bütün gün ərzində şəkər qəti qadağan edilir, gün ərzində 1 ədəd qənddən artıq qəbul etməyə icazə verilmir. Kreml pəhrizinə qaydasında əməl etdikdə 8 günə 5-6 kq arıqlamaq mümkündür. Bir məsələni də nəzərə almaq lazımdır: çəki çox olduqca, pəhriz zamanı çəki itkisi də o qədər çox olur.

Pəhriz zamanı şirin un məmulatları, kartof yeməklərini, düyü və çörəyi rasiondan çıxarmaq lazımdır. Gün ərzində yalnız ət, balıq, pendir və tərkibində az miqdarda  karbohidrat olan tərəvəzlərdən istifadə edilməlidir.  Gün ərzində 40-60 arası xal toplamağa çalışmaq lazımdır. 60-dan yuxarı xal topladıqda artıq kiloları atmaq olmur. Pəhriz müddətində mütləq çoxlu maye, təxminən günə 1.5-2 litr qəbul edilməlidir. Kreml pəhrizinin əks göstərişləri də mövcuddur: xroniki ürək, damar, mədə, böyrək xəstəlikləri olanlar və hamilə qadın pəhrizə başlamazdan öncə mütləq həkim-diyetoloqa müraciət etməlidirlər.