Məşhur yazıçı  Lourens Darrelin romanında satıcı sevgilisinə ətir seçməkdə çətinlik çəkən gəncə: "Mənə qadının adını de, ətrini verim”- deyir.
İlk baxışda asan görünsə də, əslində bizə doğru olan ətiri seçməkdə çox zaman çətinlik çəkirik. Amma bu incə sənətin də öz sirləri var. İndi verəcəyimiz məlumatlar ətir seçimində sizə ən doğru yolu göstərəcək! Qadınlar ətir qoxusunun gün ərzində qalıcı olmasını arzulayırlar. Bəs onun bədəndə uzun müddət qalmasını necə təmin etmək olar? Ətirin ən qalıcı olduğu nöqtələr hansılardır?

Ekspertlərə görə, ətirin ən ideal istifadə zamanı duş sonrasıdır. Sürətli qan dövranı səbəbindən bədən istiliyi, qoxunun dəriyə daha uzunmüddətli şəkildə hopmasını təmin edir. Biləyə sürtülən ətir isə ovuşdurma nəticəsində molekullarının zərər görməsi səbəbindən qoxu funksiyasını itirir. Estee Lauderin ətir vurmaqla əlaqədar əfsanəvi bir üsulu var. O, ətiri əvvəl havaya sıxıb, sonra yaranan qoxu buludunun altında dayanmağı məsləhət görür.

Ətirin bədəndə uzunmüddətli qaldığı nöqtələr
Ətir qoxusunun bədəndə uzunmüddətli qaldığı ən ideal nöqtələr gicgahlar, sinə və biləklərdir. Bədənin bu hissələri qan damarlarının dəriyə ən yaxın olduğu yerlərdir və burada istilik daha yüksək olur. Bu da qoxunun həmin nahiyələrdə mükəmməl şəkildə bədənə hopmasını təmin edir. Ətirin qalıcılığı dəri tipi ilə bilavasitə əlaqəlidir. Quru dərilər qoxunun aromatik tərkibini yağlı dərilər qədər yaxşı mühafizə edə bilmir. Beləliklə, əgər ətirin bədəndə uzunmüddətli qalmasını istəyirsinizsə, aşağıdakı qaydalara riayət edin:
-Topuğa və dizin arxa hissəsinə vazelin, ya da qoxusuz krem çəkin. Vazelin çəkdiyiniz hissəyə ətir vurun.
-Bir biləyinizə ətir vurub, digər biləyinizlə 5-6 saniyə onu sıxın. Ovuşdurmayın, çünki bu zaman ətirin qoxusu dağılır.
-Ətiri qulaq arxalarına və boynunuza da sıxmağı utunmayın.
-Sinə və dekolte hissələrində də ətir uzun müddət qalır. Ürək hissəsi daim döyündüyü üçün qoxunuz gün ərzində ətrafa yayılır.
-Ətiri saç fırçasının  üzərinə sıxıb, saçlarınızın uc hissələrini darayın. Bu, ətirin saçlarınızda gün boyu qalmasını təmin edəcək.  

Hansı qoxu nə vaxt istifadə edilməlidir?
Ağır, oriental qoxular xüsusi gecələrdə xoş təsir bağışlasalar da, iş görüşmələri üçün çox tünd ola bilərlər. Başqa sözlə, gün nə qədər erkən başlayırsa, ətir də o qədər yüngül olmalıdır. Gecənin irəliləyən saatlarında isə daha ağır qoxulardan istifadə oluna bilər.

Ətir harada saxlanılmalıdır?
Xanımların əksəriyyətinin ətiri saxlamaq üçün sevdiyi yerlərdən biri vanna otağıdı. Ancaq bu işıqlıq, isti və nəmli mühit, ətirin ömrünü qısaldır. Ən yaxşısı qapağı bağlı olaraq nəmsiz, sərin və qaranlıq bir yerdə, məsələn şkafda ya da siyirtmədə saxlamaqdır. Hətta soyuducular da ətirlər üçün ideal yer olaraq tövsiyə edilir.