Dərdini suya danışma, Axıb çöllər boyunca Dərdli çiçəklər bitirər. Dərdini quyuya danışma Bənd-bənd kəsilmiş Tütəklər bitirər. Dərdini mənə danış, Dərd qədrini, dərdli bilər... Dərdini ulduzlara demə, Onlara bəsdi. Dərdini mənə de, Ürəyim dərdlərə qəfəsdi. Orda heç kəsin görmədiyi Dərd şəklində sərgi var. Dərdin mənə ərki var. Yayda soyuq baxışlardan üşüyən, Qışda yalançı sevgilərdən tikilən, Iynəbatmaz kürküm var. Dərdini mənə danış Dərdbilməzə söyləmə. Sənə təzə dərd doğar Dolu dəryaya yağar. Dərdin o üzə güləni pisdi Dərdin qəfil gələni pisdi Kim dərdini suya danışır? Dərdini mənə danış Özüm dərdə sarı gəlirəm. Nazim Hıkmət demişkən : "Adam var otların çeşidini bilir, adam var quşların, Mən dərdlərin çeşidini bilirəm." Dərdini mənə danış Dərd qədrini dərdli bilər.