Gəldim qapınıza, gəldim, dayandım,
Böyük ürək idi, qarşına çıxmaq.
Bir hikkə, bir acıq var idi səndə,
Cəsarət istərdi üzünə baxmaq.

İçimdə çəkirdim bütün əzabı,
Çölümdə bir dənə xəsarətim yox.
Mən səni qarşımda görüb, anladım,
Sənə söz deyəcək cəsarətim yox.

Sən o gün əl açıb kaş yerə, göyə,
Tanrıdan ömrümə ah diləyərdin.
Nə dindin, danışdın, nə də ki, nəysə..
Kaş məni əzərdin, su eləyərdin.

Bu da bir yaşanmış xatirə oldu,
Bunu da qəlbimə gömdüm ömürlük.
Sənədək xəyalı göydə gəzirdim,
Mən o gün özümə döndüm ömürlük.

Səfail Aqiloğlu