Qurumun oduna alışır yaşım,
Ömrün dolayında qalmışam naşı.
Elə daşdan-daşa dəyibdir başım
Çıxır xatirələr yadımdan, heyif.

Gedirəm duyğusuz nadan badına,
Bizim sevgimizin adı, dadı nə?
Sevənlər qızındı mənim oduma
Od ala bilmədin odumdan, heyif.

Başıma bəlasan, qaça bilmədim,
Qırdın qanadımı, uça bilmədim,
Sirli bir boxçasan, aça bilmədim,
Baş aça bilmədim kodundan, heyif.

Eşqinin yolunda bitib qarıdım,
Uçan durnalardan sorub aradım.
Yarıyan yarıdı, mən yarımadım-
Dostun doğmasından, yadından heyif.

Gözümdə ömürlük muradım qalıb,
Yanmışam, kül altda qor, odum qalıb.
Üstündə quruca bir adım qalıb-
Heyf, üstündəki adımdan heyif.