Dünya köhnə dünyadı,
Sevgiləri təzədi.

Görüşə gedəni var,
Görüşdən gələni var.
Kövrəlib ağlayanı,
Ürəkdən güləni var.

Son bahar yarpaqları
Saralmış xatirədir.
Dünyaya sevgi gəlir,
Dünyadan sevgi gedir.

Dağlarda qar əridi,
Qışın üzü yazadı.
Dünya köhnə dünyadı,
Gülüşləri təzədi.

Çəmənlərə şeh düşür,
Sırğa taxır çiçəklər.
Çiçəkləri gül əllər
Çəməndən dərəcəklər.

Hər ürək çiçək kimi
Məhəbbətlə açılır.
Ömrümüzə bir eşqin
Son ünvanı yazılır.

Hər çiyəyin ünvanı
Bir gülüzlü qızadı.
Dünya köhnə dünyadı,
Çiçəkləri təzədi.

Göylər baxıb güllərə
Hər səhər güzgülənir.
Hər axşam ulduzlardan
Yeni sevgi ələnir.

Ulduzların bizimlə
Sirli bir söhbəti var.
Sevənlərin köksündə
Dəniz məhəbbəti var.

Yenə də ömrümüzü
Gül-çiçəklər bəzədi.
Xatirələr dil açdı,
Sevgi nəğməsini dedi.
Dünya köhnə dünyadı,
Sevgiləri təzədi...

Nüsrət Kəsəmənli