A zalım, heç məni düşünmədinmi, 
Üstümü kim örtər, kim baxar deyə.
Gecələr yorğana bürünmüş halda 
Pəncərə önündə darıxar deyə… 

"Nə yedim, nə içdim, mən necə oldum",
Bəlkə də bu haqda fikirləşmədin.
Çətin ki sən məni başa düşəsən, 
O vaxt da heç məni başa düşmədin… 

Necə də sakitsən, necə də səssiz, 
Elə bil heç bir şey olmamış kimi.
Elə tək qalmışam bu dörd-divarda, 
Heç vaxtı belə tək qalmamış kimi… 

Çölə-bayıra da çıxa bilmirəm, 
Küçələr, səkilər gəlir üstümə.
Bir gün eşitsən ki, dəli olmuşam, 
Səni sevdiyimi demə heç kimə…