Avropa ölkələrində Yeni il günü qeyri-adi gözəlliyə malik olan bir gülü hədiyyə etmək adət halını alıb. O öz gözəlliyi ilə insanda əsl bayram əhval ruhiyyəsi yaradır. Bu gülün adı Puantesiyadır. Çiçəkləri çox xırda olsa da, ətrafındakı xırda ləçəklər insanda çiçəyin böyük olması fikrini yaradır. Və ulduzu xatırladır. Krem rəndi, ağ və çəhrayı növləri olsa da daha çox qırmızı rəngli olanı məşhurdur. 
Bu mövcud olan çox az ev bitkisi növündəndir ki, dekabr və mart ayları ərəfəsində çiçək açır. Puantesiyanın vətəni Meksikanın tropik meşələri hesab edilir. Məhz orda ilk dəfə həkim-botanik C.R.Poynsett bu bitkini görmüşdür ki, adını da onun adı ilə bağlayırlar. 1834-cü ildə bir neçə növü ABŞ-a gətirilərək botanika bağında yetişdirilmişdir. Puantesiya ilə Yeni il ərəfəsində evləri bəzəmək adəti ilk dəfə Amerikada yaransa da, tezliklə bütün Avropa ölkələrinə də yayılmışdır.