Nigaha girməyin ən sadə yolu Mesopotamiyada idi desək, yəqin ki, yanılmarıq. Orada kişi şahidlərin iştirakı ilə qadının üzünü duvaqla örtərək deyirdi: “O mənim həyat yoldaşım oldu”.

Bəzi xalqlarda qız insana yox, cansız əşyaya da gedə bilər. Belə nigahlar əsasən yetkinlik yaşına çatmayan qızlara şamil edilir. Ölü ilə nigah qeyri-mümkün sayılsa da, hələ də Çində belə nigahlar bağlanmaqdadır və onlar “ruhlarla toy” və ya “cəhənnəm toyu” adlandırılır.

Ruandada nigah bağlamaq üçün qızla oğlanın bir-birinə nifrət etməsi mütləqdir. Toy mərasimindən sonra qadın kişinin evinə gedir və qırğın-qiyamət qoparır. Qadın ərini döyür, cırmaqlayır və bu, səhərədək davam edir, sonra qadın öz evinə yatmağa gedir, axşam isə dava-dalaş yenidən başlayır. Davalar bir neçə gün, hətta bir aya qədər sürə bilər. Qadının nifrəti keçəndən sonra ərinin evinə köçür. Ailənin dinc həyatı bir daha heç bir dava ilə pozulmur və qarşılıqlı sevgi hökm sürür.

Hamıya məlumdur ki, bəzi ölkələrdə çoxarvadlılıq mövcuddur. Braziliyanın bəzi regionlarında isə qadının bir neçə əri olur. Bu halda nigah qadın tərəfindən yox, əri tərəfindən qurulur. Bu belə baş verir: yoldaşının sevgilisi olduğunu öyrənən kişi məşuqu ova dəvət edir. Ovdan sonra sevgili onların evinə köçür.

Sakit okeanda minlərlə ada var ki, hər birinin yerli sakinləri tərəfindən qorunan toy adət-ənənələri var. Məsələn, adətlərdən biri yeni evlənənlərin kostyumlarının böyüyüb boya-başa çatdıqları torpağın məhsulundan hazırlanmasıdır. Samoa adasında gəlinin paltarı ağac qabığı və tut ağacı yarpağından, tər güllərdən hazırlanır, başa isə mirvari tac qoyulur.

Asiyada gənclər ipək və qırmızı rəngə bürünür. Çində qızılı və qırmızı rəng xoşbəxtlik və var-dövləti simvolizə edir, ona görə bu rənglərə hədiyyə qutularında, şamlarda da rast gəlmək mümkündür. Yaponiyada milli gəlin paltarı ipəkdən ağ kimono, ağ çiyinlik, bəzək əşyaları və gümüşü sancaqlarla bəzədilmiş xüsusi parikdən ibarətdir. Bənövşəyidən başqa (bu rəng ayrılıq rəmzidir) paltarda ağ, qırmızı və bütün rənglər ola bilər.

Avropada klas gəlinlik ağ paltardır. İnanclara görə, toy günündə gəlin bir köhnə, bir təzə, bir borca götürdüyü, bir də mavi nə isə geyinməlidir, o zaman nigah möhkəm olacaq. İngiltərədə gəlin əlinə krujeva ilə bəzənmiş nal taxır. Köhnə ayaqqabıda ərə gedir ki, bu uğur simvolu sayılır. Almaniyada belə bir adət var idi: toy zamanı gəlin bolluq rəmzi olan çörək və duz tuturdu. Buna görə gəlinliklər cibli tikilirdi. Qərbi Avropa ölkələrində gəlinlik tikdirmək və onu miras kimi saxlamaq adətdir. İspan gəlininin paltarında mütləq portağal ağacının gülləri olmalıdır – gəlin buketində və saç bəzəyində. Bu, portağal ağacının cavanlıq rəmzi sayılması ilə əlaqədardır.