İnternetdə tanış olduqları adamı evə qonaq çağıran qızlar, sonradan həmin "qurbanın könüllü razılığı" ilə ona 300 bıçaq zərbəsi vurublar.

 
Xoşbəxtlikdən, həmin adam aldığı yaralardan ölməyib.

"USA Today" bildirir ki, ABŞ-ın Miluoki şəhərində yaşayan Rebekka Çandler internetdə tanış olduğu, polisin adını açıqlamadığı adamla 2 gün birlikdə olandan sonra onu evinə çağırdığını deyib.

"Bıçaqlanmağa özü razılıq verdi. Ona zərbələrin çoxunu evdə birlikdə yaşadığım rəfiqəm vurdu", - 22 yaşlı Rebekka deyib.

Polisin verdiyi məlumata görə, Rebekka və onunla birlikdə yaşayan 20 yaşlı Reyven Lerrabi satanistlərdir.

300 bıçaq zərbəsi almasına rəğmən, ağır yaralı halda evdən qaçmağı bacaran adam isə hospitalın reanimasiya bölməsinə yerləşdirilib.

Adamın dediyinə görə, qızlar onu evə çağırandan sonra meyvə şirəsinə yuxu dərmanı qataraq içirdiblər, sonra da əl-qolunu bağlayaraq 2 gün təcavüz edəndən sonra bıçaqlayıblar.