Yun
Müasir yun parçalar iki kateqoriyaya bölünür: yun və yarımyun. Birincinin tərkibində 90-100% yun var, ikincilərin tərkibində 20-90% yun və lavsan, kapron, yaxud viskoz var. Əgər tərkibin içində 50% süni saplar varsa, onda parçada parıltı və yumrular əmələ gəlir.

Yaxşı olar ki, yun paltarlar bir çox halda əllə, xüsusi vasitələrdən istifadə etməklə yuyulsun. Yun paltar yığılmasın deyə, onu bir az ilıq suda, eyni temperaturda yuyurlar və suya çəkirlər, heç vaxt islatmırlar və burub sıxmırlar.

Axırıncı dəfə yaxalayanda yun yığılmasın deyə, xüsusi kondisionerlər əlavə edin. Rəngi çıxan yun paltarı yuduqda ilıq suya duz və sirkə tökün. Müasir paltaryuyan maşınlarda yun üçün də rejim nəzərdə tutulub, lakin bahalı yun paltarları əllə yusanız daha yaxşı olar. Ümumiyyətlə, çalışın yun paltarları tez-tez yumayın.

Yun paltarı kölgədə astar üzünə sərilmiş halda qurudun. Sviterləri və şalları (pled) daha yaxşı olar ki, xovlu məhrabaların üstünə sərib qurudasınız.

Yun malları gün şüalarının altında qurutmaq qadağandır, lakin onlara təmiz hava lazımdır, odur ki, qarderobunuzun havasını müntəzəm dəyişmək sizin üçün adət halını almalıdır.

İpək
İpək parçalar (bura həmçinin krep, atlas, qaz, fay, çesuça və məxmər aiddir) suyu çox asanlıqla özünə çəkir və çox tez quruyur.
Tər ipəyin üzərindən tez buxarlanaraq, ləkə qoya bilər. Bu halda, paltarı yumazdan qabaq tər ləkəsini spirtlə təmizləmək lazımdır. Balaca təmiz pam-bıq əsgini spirtdə isladaraq, kənardan mərkəzə doğru dairəvi hərəkətlərlə ləkəni təmizləyin.

Bahalı və eksklüziv ipəklərə qulluq üçün yazılmamış qayda var – onları kimyəvi təmizləməyə verirlər, çünki adi yumada rənglər sola bilər. Baxmayaraq ki, müasir paltaryuyan maşınlarda ipək parçalar üçün xüsusi proqramlar var, mütəxəssislər ipəyi yalnız əllə və bir az ilıq suda yumağı məsləhət görürlər. Axırıncı yaxalamada soyuq suya xüsusi kondisioner və ya 1 çay qa-şığı sirkə əlavə edirlər ki, rənglərin parlaqlığı bərpa olunsun.

Yun parça kimi, ipək parçanı da heç vaxt burub sıxmırlar, onları paltara-sanda, yaxud ipdə səliqə ilə asaraq, yalnız kölgədə qurudurlar.

Viskoz
İndiki zamanda geniş yayılmış viskozdan ipəyə, pambığa, hətta yuna və kətana bənzər parçalar yaradırlar. Hər halda, onlar təbii parçalar kimi möhkəm deyillər, ona görə də viskozdan olan mallar 30°C – 40°C temperaturda xüsusilə ehtiyatla yuyulmalıdır.

Kətan
Əvvəlki kimi dəbdə olan kətan mallar uzun müddət köhnəlmir, lakin çox tez əzilir. Yaxşı olar ki, onları yüksək temperaturda yuyasınız və hətta qaynadasınız.

Pambıq
Pambıq əşyaları kətan paltarları kimi yuyurlar, amma daha aşağı temperatur rejimində. Xüsusi qulluq tələb edən yalnız cins şalvarlardır.

Əgər cins şalvarları ilk dəfə yuyursunuzsa, onda çox ehtimal ki, onların rəngi gedəcək. Ona görə də onları başqa paltarlarla, hətta tünd rəngli paltarlarla qarışdırmayaraq yumaq yaxşı olardı. Yumanın danılmaz bir qaydası var – onları həmişə tərs üzünə çevirirlər. Cinsləri həm əllə, həm də paltaryuyan maşında yumaq olar, lakin suyun temperaturu çox yüksək olmamalıdır, ən yaxşı variant – 30°C-dir, onda mal uzun müddət qorunub saxlanır.

Əgər təsərrüfatınızda az istifadə etdiyiniz ağlar varsa, onları heç olmasa ildə 1 dəfə yumaq, saxlandığı şkafın havasını isə dəyişmək lazımdır.